అమ్మో మా వల్ల కాదు బాబోయ్.. పందెం కోడిని మేపలేక వేలానికి డేట్ ఫిక్స్

దిశ, డైనమిక్ బ్యూరో : కరీంనగర్ డిపో అధికారులకు కొత్త చిక్కు వచ్చిపడింది. నెల 9న ఓ ప్రయాణికుడు బస్సులోనే పందెం కోడిని పొరపాటున వదిలి వెళ్లిపోయిన సంగతి తెలిసిందే. అయితే, కండక్టర్ ఆ కోడిని డిపోలో అప్పగించగా.. అక్కడున్న యాజమాన్యం దానికి ప్రత్యేకంగా జాలి ఏర్పాటు చేసి దాణా, నీళ్లు పెడుతూ దాని బాగోగులు చూసుకుంటున్నారు. ఈ క్రమంలోనే కోడి సంరక్షణ తమ వల్ల కాదంటూ డిపో వాళ్లు చేతులెత్తేశారు. గత మూడు రోజులుగా కోడిని తీసుకెళ్లేందుకు ఎవరూ రాలేదని, కావున ఆ పందెం కోడి‌ని అంబేద్కర్ బస్ స్టేషన్ ఆవరణలో కరీంనగర్-2 డిపో పరిధిలో బహిరంగ వేలం నిర్వహించనున్నట్లు డిపో మెనేజర్ పేర్కొన్నారు. కావున, ఆసక్తి గలవారు బహిరంగ వేలంలో పాల్గొని కోడిని దక్కించుకోవాలని పిలుపునిచ్చారు. ఈ మేరకు రేపు మధ్యాహ్నం 3 గంటలకు వేలం ప్రారంభం కానుంది.