పాల్వంచలో 800 మెగావాట్ల విద్యుత్​ ఉత్పత్తి యూనిట్‌ను నెలకొల్పాలి.. టీఎస్‌పీఈయూ వినతి

దిశ, తెలంగాణ బ్యూరో: భద్రాద్రి కొత్తగూడెం జిల్లా పాల్వంచలో 800 మెగావాట్ల విద్యుత్​ఉత్పత్తి యూనిట్‌ను నెలకొల్పాలని డిప్యూటీ సీఎం భట్టి విక్రమార్కకు తెలంగాణ స్టేట్ పవర్ ఎంప్లాయిస్ (1535) యూనియన్ విజ్ఞప్తి చేసింది. ఈ మేరకు శనివారం 1535 యూనియన్ సెంట్రల్ కమిటీ అధ్యక్షులు ఎంఏ వజీర్, సెంట్రల్ కమిటీ సెక్రటరీ డి.రాధాకృష్ణ నేతృత్వంలోని విద్యుత్​ఉద్యోగుల బృందం పాల్వంచలో డిప్యూటీ సీఎంను కలిసి వినతిపత్రం అందజేసింది. ముఖ్యంగా విద్యుత్ ఉద్యోగులకు సంబంధించి ఈపీఎఫ్​నుంచి జీపీఎఫ్‌కు మార్చాలని విజ్ఞప్తి చేశారు. అదేవిధంగా విద్యుత్​ఆర్టీజన్​కన్వర్షన్ విషయంలో ప్రభుత్వం చొరవ తీసుకుని 20 వేల మంది ఆర్టిజన్లకు న్యాయం చేయాలని కోరారు.

1999 సంవత్సరం ఫిబ్రవరి 1 తర్వాత చేరిన వారందరినీ వారి విద్యార్హతలను బట్టి ప్రభుత్వ ఉద్యోగిగా గుర్తించి వారికి న్యాయం చేయాలని విన్నవించారు. ఇన్నాళ్లు కోరుతూ వస్తున్నప్పటికీ ఐడీ నంబర్లను ప్రశ్నించే వారని, అవి తమ వద్ద ఉన్నాయని చూపిస్తున్నప్పటికీ ఉన్నతాధికారులు సరైన న్యాయం చేయడం లేదన్నారు. ఈ విషయంలో ప్రభుత్వం చొరవ తీసుకుని ఆర్టిజన్​కన్వర్షన్​విషయంలో న్యాయం చేయాలని కోరారు. గతంలో1998 సంవత్సరంలో ఉమ్మడి రాష్ట్రంలో విద్యుత్ సంస్థలో జెన్‌కోలో, ఐడల్ కంపెనీలలో 5 వేల మంది కార్మికుల్ని పర్మినెంట్ చేసిన విషయాన్ని ఈ సందర్భంగా డిప్యూటీ సీఎం భట్టికి గుర్తు చేశారు. కాగా, యూనియన్ విజ్ఞప్తి2పై డిప్యూటీ సీఎం భట్టి విక్రమార్క సానుకూలంగా స్పందించి డిమాండ్ల పరిష్కారం కోసం హామీ ఇచ్చినట్లు ఎంఏ వజీర్, డి.రాధాకృష్ణ తెలిపారు.