గ్లోబల్ వేదికపై తెలంగాణ శోభ : కళా వైభవం, రుచుల ఘన కలయిక.. ప్రత్యేక ఆకర్షణగా సువెనీర్ కిట్లు

దిశ, తెలంగాణ బ్యూరో: ఫ్యూచర్ సిటీలో జరుగుతున్న ప్రతిష్టాత్మక తెలంగాణ రైజింగ్ గ్లోబల్ సమ్మిట్ 2025 కు హాజరవుతున్న ప్రతినిధుల కోసం తెలంగాణ టూరిజం డెవలప్మెంట్ కార్పొరేషన్ ప్రత్యేకంగా రూపొందించిన సువెనీర్ కిట్, కలినరీ కిట్‌ను అందిస్తోంది. జాతీయ, అంతర్జాతీయ ప్రతినిధుల కోసం రూపొందించిన ఈ కిట్ సమ్మిట్ లో అందరి దృష్టిని ఆకర్షిస్తోంది. తెలంగాణ కళా వారసత్వం, సాంప్రదాయ శైలులు, రుచుల వైవిధ్యాన్ని ప్రపంచానికి పరిచయం చేయడమే లక్ష్యంగా రూపొందించారు. ఈ కిట్లలోని ప్రతి వస్తువుతో పాటు దాని సాంస్కృతిక ప్రాధాన్యతను వివరించే చిన్న వివరణ జతచేశారు.

తెలంగాణ కళలకు ప్రతిరూపం సువెనీర్ కిట్ :

తెలంగాణ ప్రఖ్యాత హ్యాండ్లూమ్స్, హ్యాండీక్రాఫ్ట్ క్లస్టర్లలో నైపుణ్యంతో తయారైన కళాఖండాలతో ఈ సువెనీర్ కిట్ రూపొందించారు. ఇందులో రాష్ట్ర సాంస్కృతిక ఔన్నత్యాన్ని ప్రతిబింబించే వస్తువులు ఉన్నాయి. పోచంపల్లి సంప్రదాయ నెయ్యదళంతో నేసిన ఇకట్ స్టోల్, ముత్యాల నగరమైన హైదరాబాద్‌ ఘనతను సూచించే ఆభరణాలైన పెర్ల్ ఈరింగ్స్, తెలంగాణ సంప్రదాయ లాక్ కళతో రూపొందించిన రంగు రంగుల చుడీలు, పురాతన సుగంధ పరిమళ సంప్రదాయాన్ని గుర్తుచేసే హైదరాబాద్ అత్తర్, ప్రసిద్ధ చేరియల్ స్క్రోల్ పెయింటింగ్ కళలైన చేరియల్ ఫ్రిజ్ మాగ్నెట్ లు ఉన్నాయి.

స్వదేశీ రుచుల పరిమళంగా కలినరీ కిట్ సైతం అందించారు. తెలంగాణ సంప్రదాయ ఇంటింటా ప్రేమగా తయారు చేసే అస్తిత్వ వంతమైన వంటకాల సమాహారమే ఈ కలినరీ కిట్. రాష్ట్ర ప్రత్యేకమైన ఆహార సంస్కృతిని సాక్షాత్కరింప చేసే ఈ సంప్రదాయ వంటకాలు ప్రతి ఒక్కటి తెలంగాణ ఇంటి రుచిని ప్రతిబింబిస్తాయి. అందులో సకినాలు, అప్పాలు, మహువ లడ్డు, నువ్వుల లడ్డు, బదాం కి జాలి, మక్క పెళాలు ఉన్నాయి. ఈ రెండు కిట్లు తెలంగాణ సాంస్కృతిక దౌత్య పథకంలో భాగంగా అందించబడుతున్నాయి. హస్తకళా వస్తువులు, స్వదేశీ వంటకాలను ప్రపంచ ప్రతినిధులతో పంచుకోవడం ద్వారా, తెలంగాణ తన కళా వారసత్వాన్ని, ఆతిథ్య స్ఫూర్తిని, సాంస్కృతిక గర్వాన్ని అంతర్జాతీయ వేదికపై ప్రదర్శిస్తోంది. రాష్ట్ర కళాత్మక నైపుణ్యం, సంప్రదాయ వంటల రుచులు, సాంస్కృతిక మహిమలను ప్రపంచానికి పరిచయం చేయడంలో ముందంజలో ఉన్నందుకు తెలంగాణ టూరిజం డెవలప్మెంట్ కార్పొరేషన్ గర్వంగా ఉందని పేర్కొంది.