నా పేరు చెప్పి ఎవరైనా డబ్బులు అడిగితే నమ్మవద్దు: మంగ్లీ

దిశ, వెబ్‌డెస్క్: తన పేరు చెప్పి కొందరు వ్యక్తులు మైక్రోఫైనాన్స్ పేరిట డబ్బులు వసూలు చేస్తున్నారనే వార్తలపై ప్రముఖ సింగర్ మంగ్లీ తీవ్రంగా స్పందించారు. ఈ మేరకు సోషల్ మీడియా వేదికగా ఆమె ఒక అధికారిక ప్రకటనను విడుదల చేస్తూ, ఆరోపణలను ఖండించారు. మైక్రోఫైనాన్స్ పేరిట అక్రమాలకు పాల్పడుతున్న వ్యక్తులతో గానీ, వారి ఫైనాన్స్ వ్యాపారాలతో గానీ తనకు ఎటువంటి సంబంధం లేదని మంగ్లీ స్పష్టం చేశారు. తన వృత్తిపరమైన కార్యక్రమాల (Professional Events) కోసం చాలా మంది తనను లేదా తన తమ్ముడిని సంప్రదిస్తుంటారని, అది కేవలం ఆహ్వానాల వరకు మాత్రమే పరిమితమని ఆమె తెలిపారు. అంతకు మించి వారి వ్యక్తిగత వ్యాపార వ్యవహారాలతో తనకు కానీ, తన కుటుంబ సభ్యులకు కానీ ఎలాంటి సంబంధం లేదని వివరించారు.

దుష్ప్రచారంపై ఆవేదన..

కావాలని కొందరు తన వ్యక్తిగత పేరును, ప్రతిష్టను దెబ్బతీసేందుకు ప్రయత్నిస్తున్నారని ఆమె ఆవేదన వ్యక్తం చేశారు. సోషల్ మీడియాలో వైరల్ అవుతున్న కరెన్సీకి సంబంధించిన వీడియోలకు, తమ ఇంటికి ఎలాంటి సంబంధం లేదని తేల్చి చెప్పారు. "నా ప్రొఫెషనల్ ఈవెంట్స్ మినహా నాకు ఎలాంటి వ్యాపారాలు లేవు. దయచేసి నా పేరు చెప్పి ఎవరైనా డబ్బులు వసూలు చేస్తే నమ్మవద్దు" అని మంగ్లీ ప్రజలను కోరారు. చివరగా, ఇలాంటి మోసపూరిత విషయాల్లో తనను ఇరికించడం అన్యాయమని పేర్కొన్న మంగ్లీ.. బాధితులకు న్యాయం చేయాలని పోలీస్ డిపార్ట్‌మెంట్‌ను ఈ సందర్భంగా కోరారు.