9.5 కోట్ల హైడ్రోపోనిక్ గంజాయి సీజ్

దిశ, శంషాబాద్ : శంషాబాద్ లోని రాజీవ్ గాంధీ ఎయిర్ పోర్టులో డీఆర్ఐ అధికారులు 9.5 కోట్లు విలువచేసే 27.15 కిలోల హైడ్రో ఫోనిక్ గంజాయిని సీజ్ చేశారు. 7 మంది నలుగురు అంతర్జాతీయ ప్రయాణికులు, ముగ్గురు సహాయకులను అరెస్ట్ చేశారు. శనివారం డీఆర్ఐ హైదరాబాద్ జోనల్ యూనిట్ అధికారులు వివరాలు వెల్లడించారు. విశ్వసనీయ సమాచారంతో శుక్రవారం రాజీవ్ గాంధీ అంతర్జాతీయ విమానాశ్రయంలోని ఎయిర్‌పోర్ట్ అరైవల్ విలేజ్ వద్ద నిఘా ఏర్పాటు చేశారు. సుమారు 1:15 గంటలకు థాయ్ ఎయిర్వేస్ ఫ్లైట్ నంబర్ TG-329 ద్వారా బ్యాంకాక్ నుంచి వచ్చిన నలుగురు భారతీయ అంతర్జాతీయ ప్రయాణికులను, వారి చెక్-ఇన్ సామాను అప్పగించే సమయంలో మరో ముగ్గురు వ్యక్తులతో కలిసి అధికారులు అడ్డుకుని తనిఖీ చేశారు. ట్రాలీ బ్యాగులలో దాచిపెట్టిన పచ్చటి-గోధుమ రంగు గడ్డలుగా ఉన్న పదార్థం కలిగిన చాలా ప్యాకెట్లు లభ్యమయ్యాయి. మొత్తం 27.15 కిలోగ్రాములు ఉన్న ఆ పదార్థాన్ని నార్కోటిక్ డ్రగ్ డిటెక్షన్ కిట్ ద్వారా పరీక్షించగా, అది గంజాయి (మారిజువానా)గా నిర్ధారించబడింది. అనంతరం, నార్కోటిక్ డ్రగ్స్ అండ్ సైకోట్రోపిక్ సబ్‌స్టాన్సెస్ చట్టం, 1985 ప్రకారం 27.15 కిలోగ్రాముల హైడ్రోపోనిక్ గంజాయిని అధికారులు స్వాధీనం చేసుకున్నారు. ఈ కేసులో పాల్గొన్న మొత్తం ఏడుగురు నిందితులను అరెస్టు చేసినట్లు అధికారులు వెల్లడించారు.