బీజేపీ శ్రేణుల్లో ఫుల్ జోష్.. మే 9న తెలంగాణకు ప్రధాని మోడీ

దిశ, డైనమిక్ బ్యూరో: ప్రధాని నరేంద్ర తెలంగాణ పర్యటన ఖరారైంది. మే 9న ఆయన రాష్ట్రంలో పర్యటించబోతున్నారు. ఈ సందర్భంగా పలు అభివృద్ధి కార్యక్రమాలకు శంకుస్థాపన చేయబోతున్నారు. అనంతరం పరేడ్ గ్రౌండ్‍లో భారీ బహిరంగ సభ నిర్వహణకు తెలంగాణ బీజేపీ ఏర్పాట్లు చేస్తోంది. అయితే మూడోసారి ప్రధాని అయ్యాక మోడీ తెలంగాణలో పర్యటించడం ఇదే తొలిసారి కావడంతో ఈ టూర్‍ను తెలంగాణ బీజేపీ అత్యంత ప్రతిష్టాత్మకంగా తీసుకుంటోంది. గత కొంత కాలంగా అంతర్గత సమస్యలతో సతమతం అవుతున్న టీ బీజేపీకి మోడీ టూర్ కాషాయ శిబిరంలో కొత్త జోష్ నింపే సూచనలు కనిపిస్తున్నాయి.

సెట్ రైట్ అయ్యేనా?:

ప్రస్తుతం తెలంగాణ రాజకీయం రసవత్తరంగా సాగుతోంది. ప్రధాన పార్టీల మధ్య నువ్వా నేనా అన్నట్లు ఎత్తుకు పై ఎత్తుల పర్వం కొనసాగుతోంది. ఇటీవల సీఎం రేవంత్ రెడ్డి, కేసీఆర్ బహిరంగ సభలతో ఇరు పార్టీల మధ్య పొలిటికల్ వార్ రంజుగా సాగింది. ఈ క్రమంలో తెలంగాణ గడ్డపై ఎంట్రీ ఇవ్వబోతున్న మోడీ ఎలాంటి వ్యూహరచనతో రాబోతున్నారు అనేది ఉత్కంఠగా మారింది. మరోవైపు ఇటీవల మహిళా బిల్లు, డీలిమిటేషన్ విషయంలో సీఎం రేవంత్ రెడ్డి కేంద్ర ప్రభుత్వంపై తీవ్ర స్థాయిలో విమర్శలు గుప్పించారు. ఈ నేపథ్యంలో రాష్ట్ర పర్యటనలో మోడీ ఎలా ఎటాక్ చేస్తారనేది తెలియాల్సి ఉంది. ఇక గత కొంత కాలంగా తెలంగాణ బీజేపీ నేతల మధ్య ఆధిపత్య పోరు చర్చగా మారింది. ఈ అంశంలో గతంలోనే మోడీ హెచ్చరించినా నేతలు తమ తీరు మార్చుకోలేదనే అసంతృప్తి సొంత పార్టీలోనే వినిపిస్తోంది. ఇటువంటి పరిస్థితుల్లో మోడీ పర్యటన తెలంగాణ బీజేపీకి ఎటువంటి దిశానిర్దేశం చేయబోతున్నారు అనేది ఆసక్తిగా మారింది.