డబ్బులు ఉంటేనే టిక్కెట్టా..? వారికి విలువే లేదా..?

ఈ విషయం నియోజకవర్గ స్థాయి నాయకుల వరకు వెళ్లడంతో బాల్కొండ నియోజకవర్గంలోని ఓ నేత మండల, పట్టణ అధ్యక్షులుగా గట్టిగానే గడ్డి పెట్టినట్లు స‌మాచారం. భీమ్‍ గల్ మండలంలోని ఓ మేజర్ గ్రామపంచాయతీకి చెందిన ఓ కాంగ్రెస్ పార్టీ కార్యకర్త తన గ్రామంలో ఎంపీటీసీ స్థానం తనకు అనుకూలంగా రిజర్వ్ కావడంతో పోటీ చేసేందుకు ఆసక్తిని కనబరిచాడు. టికెట్ కోసం మండల పార్టీ అధ్యక్షుడితో పాటు పార్టీలో యాక్టివ్ గా ఉన్న మరో పట్టణ స్థాయి నాయకుడిని కలిసి టికెట్ కోసం అడిగితే డబ్బులెన్ని ఉన్నాయంటూ చులకనగా ప్రశ్నించడంతో ఆవేధనకు గురైన సదరు కార్యకర్త రాష్ట్రస్థాయిలో ఓ కార్పొరేషన్ కు చైర్మన్ గా ఉన్న నేతకు ఫిర్యాదు చేశారు. భీమ్‍గల్ మండలంలోని ఓ గ్రామంలో దుర్గాదేవి శోభాయాత్రలో పాల్గొనేందుకు వచ్చిన సదరు నేత పార్టీలో ఇష్టారీతిన నిర్ణయాలు తీసుకునే అధికారం మీకెవడిచ్చారంటూ మండల కాంగ్రెస్, పట్టణ కాంగ్రెస్ పార్టీ అధ్యక్షులపై పలువురు కార్యకర్తలు, నాయకుల ముందే ఫైర్ అయ్యారు. డబ్బులున్నోడే పోటీలో ఉండాలి. వారికే టికెట్ ఇస్తామంటే.. ఇన్నేళ్లు కష్టకాలంలో కూడా పార్టీకి అండగా ఉన్న వారిని కూడా అవకాశం వచ్చినపుడు ఆదరించకపోతే ఎలా ? అంటూ తీవ్ర స్వరంతోనే మందలించారు. డబ్బుల్లేని పార్టీ విధేయులను ఎలా గెలిపించుకోవాలో పార్టీకి తెలుసు అని సదరు నేత గట్టిగానే చెప్పారు. మమ్మల్ని సంప్రదించకుండా, మాకు తెలియకుండా అనవసర రాజకీయాలు చేస్తే తాట తీస్తానన్న రీతిలో హెచ్చరించారు. ఇది పార్టీలో తీవ్ర చర్చనీయాంశమైంది.