పొంగిపోర్లుతున్న వాగులు,చెరువులు

దిశ, భీమ్‌గల్ :‌ భీమ్‌గల్ మండలంలో ఏకధాటిగా భారీ వర్షం కురుస్తోంది. ఈ వర్షానికి మండలంలోని కప్పల వాగు పొంగిపొర్లుతుంది. అన్ని గ్రామాల్లో చెరువులు, కుంటలు నిండిపోయాయి. పంట నష్టం వాటిల్లింది. రోడ్ల పై నుండి ప్రవహిస్తున్న నీరుతో రాకపోకలకు అంతరాయం ఏర్పడింది. మండలంలో ఇప్పటి వరకు ముచ్కూర్ గ్రామంలో 3, దేవక్కపేట్ లో ఒక ఇల్లు కూలిపోయింది.

ఈమేరకు తహసీల్దార్ శ్రీధర్ వెల్లడించారు. పట్టణంలో మొగిలి చెరువు పూర్తిగా నిండడంతో దాని కింద ఉన్న కాలనీలు నీటితో జలమయం అయ్యాయి. ఇంట్లో నుండి బయటకు రాని పరిస్థితి కాలనీ వాసులకు నెలుకొంది. వేల్పూర్ వెళ్లే రోడ్డు పూర్తిగా నీటితో నిండి పోయింది. దీంతో రాకపోకలకు అంతరాయం ఏర్పడింది. పట్టణంలోని ఎస్సీ కాలనీలో కూలి పోయే పరిస్థితిలో ఉన్న ఇండ్లను సీఐ వెంకటేశ్వర్లు, ఎస్సై హరిబాబు సిబ్బందితో కలిసి అక్కడికి చేరుకొని పరిస్థితిని పరిశీలించారు. ప్రజలు ఎలాంటి ఆపదలో ఉన్నా పోలీస్ స్టేషన్ కు లేదా 100 నంబర్ కి కాల్ చెయ్యాలని కోరారు.