నిజామాబాద్ లో హనీ ట్రాప్..!

నాందేడ్​కు చెందిన భార్యాభర్తలు..

రూరల్​ పోలీసులు తెలిపిన వివరాల ప్రకారం.. మహారాష్ట్రలోని నాందేడ్ జిల్లా మథ్కేడ్​ తాలూకా ముక్రంబాద్​ గ్రామానికి చెందిన మంగేష్కర్​ గైక్వాడ్​, ఉజ్వల గైక్వాడ్ భార్యాభర్తలు. వీరు నగర శివారులోని మాధవనగర్​ ప్రాంతంలోని ఓ ఇంట్లో అద్దెకుంటున్నారు. సులభంగా డబ్బు సంపాదించాలనుకున్న వీరు హనీ ట్రాప్ దందాకు తెరలేపారు. ఉజ్వల గైక్వాడ్​ తన భర్తతో కలిసి రెండు నెలలుగా నగరంలోని కంఠేశ్వర్ బైపాస్, ఆర్మూర్​ రోడ్డులో నిలబడి ఒంటరిగా బైక్ ​పై వెళ్తున్న యువకులను, పురుషులను ఆకర్శించేలా నవ్వుతూ, సైగలు చేస్తూ ఆకర్షిస్తోంది. కళ్లెగరేస్తూ సైగలు చేసి దగ్గరికి పిలుస్తుంది. తన దగ్గరికొచ్చిన వారితో మాటామాటా కలిపి తను రేటు మాట్లాడుకుంటుంది. రేటు మాట్లాడుకొని, ఆవ్యక్తిని బైక్​పై ఎక్కి నిర్మానుష్య ప్రదేశానికి తీసుకెళ్తుంది. ఇవన్నీ దూరం నుంచి గమనిస్తున్న మహిళ భర్త మంగేష్కర్​ గైక్వాడ్​, వారిని ఫాలో అవుతూ వారి వెనకే వెళ్తాడు. వారికి అనుకూలంగా ఉన్న నిర్మానుష్య ప్రదేశానికి వెళ్ళగానే ఆ వ్యక్తిని బెదిరించి డబ్బులు వసూలు చేస్తున్నారు.

గ‌త కొద్ది నెలలుగా ఈ భార్యా భర్తలిద్దరూ ఇలాగే బైక్​పై వెళ్లేవారిని సెక్స్ ఆశగా చూపి ట్రాప్ చేస్తున్నారు. తనను బలవంతంగా కిడ్నాప్ చేసి తీసుకెళ్లి అత్యాచారయత్నం చేశాడని కేసు పెడ్తామని చెప్పి బెదిరించి డబ్బులు దండుకున్నారు. ఇప్పటికే ఈ దంపతుల వలలో చిక్కి మోసపోయిన వారిలో కొందరు పోలీసులకు ఫిర్యాదు చేసినట్లు సమాచారం. దీంతో ఈ అంశాన్ని సీరియస్ గా తీసుకున్న పోలీసులు కొద్ది రోజుల క్రితం హానీ ట్రాప్ జంట పై నిఘావేసి నగర శివారులోని ఓ ప్రాంతంలో వీరిని రెడ్ హ్యాండెడ్ గా పట్టుకున్నారు. పోలీసులు తమదైన శైలిలో విచారించగా భార్యాభార్తలిద్దరూ తాము చేసిన నేరాన్ని ఒప్పుకోవడంతో నిందితులిద్ద‌రినీ అరెస్ట్ చేసి రిమాండ్ కు తరలించారు. నిందితుల వద్ద వెపన్ కూడా లభ్యమైనట్టు తెలిసినప్పటికీ అధికారికంగా ధృవీక‌రించ‌లేదు.