ధర్వేశిపురంలో చెత్త డంపింగ్ సెగ.. కుళ్లిపోతున్న జనావాసాలు

ధర్వేశిపురం గ్రామంలో జనావాసాల మధ్య ఉన్న చెత్త డంపింగ్ యార్డ్ కారణంగా ప్రజలు తీవ్ర ఆరోగ్య సమస్యలతో సతమతమవుతున్నారు. వ్యర్థాల దుర్వాసన, చెత్తను తగులబెట్టడం వల్ల వచ్చే విషపూరిత పొగతో గ్రామస్తులు, పాఠశాల విద్యార్థులు ఊపిరి పీల్చుకోలేక అల్లాడుతున్నారు. ఈగలు, దోమల బెడదతో అంటువ్యాధులు ప్రబలుతున్నా పంచాయతీ అధికారులు పట్టించుకోకపోవడంపై స్థానికులు తీవ్ర ఆగ్రహం వ్యక్తం చేస్తున్నారు. వెంటనే డంపింగ్ యార్డును దూరంగా తరలించాలని, లేనిపక్షంలో పెద్ద ఎత్తున ఆందోళనలు చేపడతామని గ్రామస్తులు హెచ్చరిస్తున్నారు.

- దిశ, కనగల్

దిశ, కనగల్ : కనగల్ మండలంలోని ధర్వేశిపురం గ్రామంలో ఏర్పాటు చేసిన చెత్త డంపింగ్ యార్డ్ స్థానిక ప్రజల పాలిట శాపంగా మారింది. జనావాసాలకు అతి సమీపంలో ఈ డంపింగ్ యార్డ్‌ను ఏర్పాటు చేయడంతో గ్రామం అంతా దుర్వాసనతో నిండిపోతోంది. నిత్యం సేకరించిన చెత్తను, ఫంక్షన్ హాల్స్ నుంచి వచ్చే వ్యర్థాలను జనావాసాల మధ్యే పారబోస్తుండడంతో గ్రామస్తులు ఊపిరి పీల్చుకోవడానికి కూడా సాహసించలేకపోతున్నారు. ఈ అపరిశుభ్ర వాతావరణం కారణంగా చిన్నారులు, వృద్ధులు, మహిళలు ఇంటి నుంచి బయటకు రావాలంటేనే భయపడుతున్నారు.

విష వాయువులతో ప్రాణాపాయం..

డంపింగ్ యార్డులో పేరుకుపోయిన చెత్తను శాస్త్రీయంగా నిర్వీర్యం చేయకుండా, సిబ్బంది తరచూ దానికి నిప్పు పెడుతున్నారు. దీనివల్ల వెలువడుతున్న దట్టమైన పొగ చుట్టుపక్కల ఉన్న ఇళ్లను కమ్మేస్తోంది. ఈ విషపూరిత పొగ కారణంగా గ్రామస్తులలో దగ్గు, జలుబు, దీర్ఘకాలిక శ్వాసకోశ సంబంధిత సమస్యలు పెరుగుతున్నాయని బాధితులు ఆవేదన వ్యక్తం చేస్తున్నారు. ముఖ్యంగా ఉదయం, సాయంత్రం వేళల్లో పొగ తీవ్రత ఎక్కువగా ఉండడంతో ఊపిరి ఆడక ప్రజలు అల్లాడిపోతున్నారు.

కలుషితమవుతున్న పరిసరాలు..

ఈ డంపింగ్ యార్డ్ కారణంగా పరిసరాల్లో ఈగలు, దోమలు విపరీతంగా పెరిగిపోయాయి. తద్వారా డెంగ్యూ, మలేరియా వంటి ప్రమాదకరమైన వైరల్ జ్వరాలు ప్రబలే అవకాశం ఉందని స్థానికులు భయాందోళన చెందుతున్నారు. వర్షాలు పడిన సమయంలో చెత్త కుప్పల నుంచి మురుగునీరు రోడ్లపైకి చేరుతూ పరిస్థితిని మరింత దారుణంగా మారుస్తోంది. డంపింగ్ యార్డుకు కూతవేటు దూరంలోనే పాఠశాల ఉండడంతో విద్యార్థుల ఆరోగ్యం కూడా ప్రమాదంలో పడుతోందని తల్లిదండ్రులు మండిపడుతున్నారు.

అధికారుల నిర్లక్ష్యం.. గ్రామస్తుల హెచ్చరిక

ఈ తీవ్రమైన సమస్యపై గ్రామస్తులు పలుమార్లు పంచాయతీ అధికారులకు మొరపెట్టుకున్నా, ఇప్పటివరకు ఎటువంటి చర్యలు తీసుకోకపోవడం గమనార్హం. ప్రజా ఆరోగ్యాన్ని గాలికి వదిలేసి అధికారులు నిర్లక్ష్యంగా వ్యవహరిస్తున్నారని ప్రజలు ఆగ్రహం వ్యక్తం చేస్తున్నారు. తక్షణమే ఈ డంపింగ్ యార్డును గ్రామానికి దూరంగా తరలించాలని, లేనిపక్షంలో గ్రామస్తులందరూ ఏకమై పెద్ద ఎత్తున ఆందోళన కార్యక్రమాలు చేపడతామని వారు హెచ్చరిస్తున్నారు.

పొగతో ఊపిరి ఆడడం లేదు

గ్రామంలోని చెత్తను మొత్తం తీసుకొచ్చి గ్రామ సమీపంలో పోస్తున్నారు. అలాగే రోడ్డు వెంట పోసి నిప్పు అంటించడంతో విపరీతమైన పొగ, వాసన, దుర్గంధం వెలువడుతోంది. పొగ, వాసన భరించలేకపోతున్నాం. పొగతో విపరీతంగా దగ్గు వస్తుంది. ఇక్కడినుంచి వెంటనే చెత్తకుప్పని ఎత్తివేయాలి.

– వింజమూరి వెంకన్న, ధర్వేశిపురం గ్రామం