‘సైబర్’ వలలో పడకుండా తప్పించుకున్న తల్లి

‘సైబర్’ వలలో పడకుండా తప్పించుకున్న తల్లి

- కూతురు డేంజర్ లో ఉందంటూ బెదిరింపు ఫోన్ కాల్

- అప్రమత్తతతో పోలీసులకు ఫిర్యాదు..

- మహిళ ధైర్యాన్ని ప్రశంసించిన పోలీసులు

దిశ, హుజురాబాద్ రూరల్ : పెరుగుతున్న సైబర్ నేరాల మధ్య ఒక తల్లి తన తెలివితేటలు, అప్రమత్తతతో సైబర్ నేరగాళ్ల వల నుంచి బయటపడింది. గుర్తుతెలియని నంబర్ నుండి వచ్చిన బెదిరింపు ఫోన్ కాల్‌ను ధైర్యంగా ఎదుర్కొని, సరైన సమయంలో స్పందించి, పెద్ద ఆర్థిక నష్టం నుంచి తప్పించుకుంది. ఈ ఘటన సైబర్ మోసాల పట్ల ప్రజలు ఎంత అప్రమత్తంగా ఉండాలో తెలియజేసింది. మోసపూరిత ఫోన్ కాల్ తో సైబర్ నేరగాళ్లు సాధారణంగా వ్యక్తులను భయపెట్టి, ఆందోళనకు గురిచేసేలా మాట్లాడతారు. ఈ కేసులో కూడా అదే జరిగింది. సైబర్ నేరగాళ్లు ఒక గుర్తుతెలియని నంబర్ నుండి హుజురాబాద్ పట్టణానికి చెందిన నుస్రత్ అనే మహిళకు ఫోన్ చేసి, "మీ కూతురు ఒక తీవ్రమైన కేసులో ఇరుక్కుంది. ఆమె ప్రస్తుతం పోలీసుల కస్టడీలో ఉంది" అని నమ్మించారు. ఆ తల్లి ఆందోళనను గమనించి, కేసు పరిష్కారం కోసం తక్షణమే రూ. 30వేలు చెల్లించాలని డిమాండ్ చేశారు. సైబర్ నేరగాళ్లు తమ మాటలతో ఆ తల్లిని మానసికంగా మరింత ఒత్తిడికి గురిచేసే ప్రయత్నం చేశారు. మొదట్లో ఆందోళనపడినప్పటికీ, ఆ తల్లి వెంటనే తేరుకుంది. సైబర్ నేరగాళ్ల మాటలను నమ్మకుండా, తన కూతురు క్షేమంగా ఉందో లేదో తెలుసుకోవాలని నిర్ణయించుకుంది. ఆమె వెంటనే తన కూతురు చదువుతున్న కళాశాలకు వెళ్లింది. అక్కడ తన కూతురు క్లాసులో క్షేమంగా, సంతోషంగా ఉండటం చూసి ఊపిరి పీల్చుకుంది. ఆ క్షణమే ఆమెకు ఆ ఫోన్ కాల్ ఒక మోసపూరితమైనదని అర్థమైంది. తర్వాత, ఆమె వెంటనే స్థానిక పోలీస్ స్టేషన్‌కు వెళ్లి జరిగిన విషయం మొత్తం వివరించింది. ఆ సైబర్ నేరగాళ్లు వాడిన ఫోన్ నంబర్‌ను పోలీసులకు అందించింది. తల్లి యొక్క ఈ ధైర్యం, అప్రమత్తతను పోలీసులు కూడా ప్రశంసించారు. ఆమె తీసుకున్న నిర్ణయం వల్ల పెద్ద ఆర్థిక నష్టం తప్పిందని పేర్కొన్నారు. ఈ సంఘటనపై సీఐ కరుణాకర్ మాట్లాడుతూ.. ఇలాంటి మోసాల పట్ల ప్రజలు ఎల్లప్పుడూ అప్రమత్తంగా ఉండాలని సూచించారు. గుర్తుతెలియని నంబర్‌ నుండి వచ్చే ఫోన్ కాల్స్‌ ను నమ్మవద్దని, ముఖ్యంగా ఆర్థిక లావాదేవీల గురించి అడిగితే అస్సలు స్పందించవద్దని సూచించారు. ఎవరైనా మీ కుటుంబ సభ్యులు ప్రమాదంలో ఉన్నారని చెప్పినప్పుడు, భయపడకుండా వెంటనే నేరుగా వారికి ఫోన్ చేసి క్షేమంగా ఉన్నారో లేదో తెలుసుకోవాలన్నారు. ఫోన్ కాల్స్‌ లో మీ వ్యక్తిగత లేదా ఆర్థిక సమాచారాన్ని ఎవరికీ తెలియజేయవద్దన్నారు. బ్యాంక్ వివరాలు, ఓటీపీలు, పాస్‌వర్డ్‌ లు వంటివి ఎప్పటికీ షేర్ చేయవద్దని తెలిపారు. మీకు ఏదైనా మోసపూరిత ఫోన్ కాల్ వచ్చినట్లు అనుమానం ఉంటే, వెంటనే స్థానిక పోలీసులకు లేదా సైబర్ క్రైమ్ విభాగానికి సమాచారం ఇవ్వాలని సీఐ పేర్కొన్నారు.