తెలంగాణ ఉన్నత విద్యా సంస్కరణలపై మిజోరం ఆసక్తి.. టీజీసీహెచ్‌ఈ చైర్మన్‌‌తో విద్యా డైరెక్టర్‌ భేటీ

దిశ, తెలంగాణ బ్యూరో: రాష్ట్రంలో విద్యార్థులకు ఉద్యోగావకాశాలను మెరుగుపరిచేందుకు నైపుణ్య ఆధారిత, పరిశ్రమ అనుబంధ కార్యక్రమాల విస్తరణకు చర్యలు తీసుకుంటున్నామని ఉన్నత విద్యా మండలి చైర్మన్ ప్రొఫెసర్ వి. బాలకిష్టా రెడ్డి తెలిపారు. రాష్ట్ర ఉన్నత విద్యా రంగంలో జరుగుతున్న కీలక సంస్కరణలు, ఆవిష్కరణలు భవిష్యత్తు దృష్టిని తెలుసుకోవడానికి మిజోరం ప్రభుత్వ ఉన్నత, సాంకేతిక విద్యా డైరెక్టర్‌ శివ గోపాల్ రెడ్డి మంగళవారం టీజీసీహెచ్ఈ చైర్మన్ బాలకిష్టా రెడ్డిని కలిశారు. ఈ సందర్భంగా, చైర్మన్ రాష్ట్రంలో ఉన్నత విద్యా రంగంలో అమలు చేస్తున్న పలు కార్యక్రమాలను మిజోరం అధికారులకు వివరించారు. జాతీయ, అంతర్జాతీయ ప్రమాణాలకు అనుగుణంగా యూజీ కోర్సుల్లో భారీగా పాఠ్యప్రణాళికల ఆధునీకరణను టీజీసీహెచ్‌ఈ చేపట్టిందన్నారు. సీఎం ఆదేశాల మేరకు, కమ్యూనికేషన్ నైపుణ్యాలను మెరుగుపరచడానికి ఇంగ్లీష్ అల్గారిథం అనే వినూత్న నమూనాను మండలి ప్రవేశ పెట్టిందన్నారు. యూనివర్శిటీల్లో పరిశోధన, ఆవిష్కరణలను బలోపేతం చేయడానికి ఎంఓయూల ద్వారా చర్యలు తీసుకుంటున్నామన్నారు.

అలాగే, తెలంగాణ జర్నల్ ఆఫ్ హయ్యర్ ఎడ్యుకేషన్ ను కూడా ప్రారంభించినట్లు తెలిపారు. విద్యార్థులకు ప్రాక్టికల్ నాలెడ్జ్ పెంచడానికి ఇంటర్న్‌షిప్‌లను ప్రవేశపెట్టామని తెలిపారు. అకడమిక్ గవర్నెన్స్, జవాబుదారీతనంలో కూడా కీలక సంస్కరణలు అమలు చేస్తున్నట్లు వివరించారు. టీజీసీహెచ్‌ఈ తీసుకుంటున్న అన్ని కార్యక్రమాలు విద్యార్థుల భవిష్యత్తుకు సిద్ధంగా, నైపుణ్య ఆధారిత, ప్రపంచ పోటీతత్వం తో కూడిన ఉన్నత విద్యా వ్యవస్థను అభివృద్ధి చేయాలనే లక్ష్యంగా ఉన్నట్లు తెలిపారు.

మిజోరం డైరెక్టర్‌ ప్రశంసలు :

తెలంగాణ చేపట్టిన సంస్కరణలను శివ గోపాల్ రెడ్డి అభినందించారు. డిజిటల్ విద్య, సెంటర్ ఆఫ్ ఎక్సలెన్స్, విద్యార్థి మద్దతు యంత్రాంగాలు, నాణ్యత హామీ వ్యవస్థలలో తెలంగాణ సాధించిన పురోగతిపై ఆయన ప్రత్యేక ఆసక్తి కనబరిచారు. రాష్ట్ర సంస్కరణ నమూనా మిజోరంలో ఉన్నత విద్యను బలోపేతం చేయడానికి ఒక విలువైన సూచనగా ఉపయోగపడుతుందని ఆయన పేర్కొన్నారు.