బలహీనుల స్థలంలో బడా బిల్డర్ పాగా..

by Disha Web Desk 20 |
బలహీనుల స్థలంలో బడా బిల్డర్ పాగా..
X

దిశ, కుత్బుల్లాపూర్ : బలహీనుల కాలనీ స్థలం కొల్లగొట్టేందుకు ఓ బిల్డర్ కుయుక్తులు పన్నాడు. తన పట్టా భూమిని ఆనుకుని ఉన్న ప్రభుత్వ సర్వే నెంబర్ స్థలం విలువ కోట్ల రూపాయలకు పలకనుండడంతో ఆ స్థలం కాజేసేందుకు పూనుకున్నాడు. మెల్ల మెల్లగా ఆ ప్రభుత్వ స్థలాన్ని తన ఆధీనంలోకి తీసుకుని కబ్జా కథకు సదరు బిల్డర్ ప్రాణం పోస్తున్నాడు. బిల్డర్ చెర బట్టిన ప్రభుత్వ స్థలం విలువ ఇక్కడి మార్కెట్ ధర ప్రకారం సుమారు రూ.5 కోట్ల పైనే పలుకుతుంది.

పూర్తివివరాల ప్రకారం నిజాంపేట్ మున్సిపల్ కార్పొరేషన్ 12వ డివిజన్ లో గత కాంగ్రెస్ ప్రభుత్వ హయాంలో నిరుపేదలకు ఇందిరమ్మ ఇళ్లను కట్టించింది. బాచుపల్లి మండలం రెవెన్యూ పరిధిలో గల నిజాంపేట్ సర్వే నెంబర్ 233/15,233/16 లలో ఎకరాలు 5:20 గుంటల ప్రభుత్వ స్థలం ఇందిరమ్మ ఇళ్ల కోసం అప్పటి ప్రభుత్వం కేటాయించింది. ఇందిరమ్మ ఇళ్ల ఫేస్ -2 కింద మొత్తం 27 బ్లాక్ లు గా నిర్మించేందుకు లే ఔట్ వేసింది. అయితే అందులో 25 బ్లాక్స్ మాత్రమే ఇందిరమ్మ ఇళ్ల సముదాయలను నిర్మించి మిగతావి రెండు బ్లాక్స్ స్థలాన్ని ఏపీ హోసింగ్ బోర్డు అధికారులు కాళీగా వదిలేశారు. ప్రస్తుతం ఈ కాళీ స్థలం పై కన్నేసిన లోకల్ బిల్డర్ అదును చూసి కోట్ల రూపాయలు విలువ చేసే సర్కారు జాగాను మింగేసేందుకు పథకం రూపొందించాడు.

ఇదిగో ఇలా కబ్జా తీరు..

నిజాంపేట్ లోని ఇందిరమ్మ కాలనీలో తనపట్టా నెంబర్ ను ఆనుకుని ఉన్న ప్రభుత్వ సర్వే నెంబర్ 233/15,233/16 లోని సుమారు 600 చదరపు గజాలు స్థలం కొట్టేసేందుకు లోకల్ బిల్డర్ కుటిల బుద్దిని కానిస్తున్నాడు. గతంలో మొదట చదును చేసి ఏకంగా బడా అపార్ట్మెంట్ నిర్మించేందుకు లోకల్ బిల్డర్ ప్రయత్నం చేయగా స్థానికులు ఈ స్థలం ప్రభుత్వ స్థలం అని అడ్డుకున్నారు. రెవెన్యూ అధికారుల నుండి కూడా ఒత్తిడి రావడంతో గత కొన్ని సంవత్సరాల కాలం నుండి కూడా ఆ స్థలం కాళీగా ఉంది.

అయితే ఆ బిల్డర్ తన పక్కనే ఉన్న ప్రభుత్వ స్థలాన్ని ఎలాగైనా దక్కించుకోవాలనే దుర్బుద్ధితో తన పట్టా భూమిలో ప్రభుత్వ స్థలం కలిపేసుకుని ప్రైవేట్ మినీ క్రికెట్ స్టేడియం నిర్మించి అద్దెకు ఇచ్చేందుకు రెడీ చేశాడు. స్థానికులు అభ్యంతరం చెప్పినప్పటికీ వారినే తిరిగి బెదిరిస్తూ కబ్జా పర్వం కానిచ్చాడు. దింతో ఇందిరమ్మ కాలనీ వాసులు మా స్థలం మాకు కాపాడి ఇవ్వండి అంటూ ప్రభుత్వ కార్యాలయాల మెట్లు ఎక్కుతున్నారు. నిజాంపేట్ మున్సిపల్ కార్పొరేషన్ కమిషనర్, మేయర్ కు ఫిర్యాదు చేసిన అనంతరం మేడ్చల్ జిల్లా కలెక్టర్ కు సైతం ఫిర్యాదు చేశారు. కబ్జాకు గురైన ప్రభుత్వ స్థలం కాపాడాలని, కబ్జా చేసిన లోకల్ బిల్డర్ పై చట్ట ప్రకారం చర్యలు చేపట్టాలని పలువురు డిమాండ్ చేస్తున్నారు.



Next Story

Most Viewed