మేడ్చల్, శామీర్ పేట్, ఫ్యూచర్ సిటీ మెట్రో రైల్ డీపీఆర్‌లు రెడీ

దిశ, తెలంగాణ బ్యూరో: మేడ్చల్, శామీర్ పేట్, ఫ్యూచర్ సిటీ మెట్రో రైల్ డీపీఆర్ ల రూపకల్పన విషయంలో ఏలాంటి ఇబ్బందుల్లేవని హైదరాబాద్ ఎయిర్ పోర్ట్ మెట్రో లిమిటెడ్ ఎండీ ఎన్వీఎస్.రెడ్డి తెలిపారు. మెట్రో రెండో దశ(బి)కి సంబంధించిన డీపీఆర్ లు పూర్తి స్థాయిలో తయారయ్యాయని, వీటిని హైదరాబాద్ ఎయిర్ పోర్ట్ మెట్రో లిమిటెడ్ బోర్డు ఈ నెల 8వ తేదీన ఆమోదించిందని ఆయన స్పష్టం చేశారు. ఇప్పుడు డీపీఆర్ లు ప్రభుత్వ పరిశీలనలో ఉన్నాయన్నారు. రాష్ట్ర ప్రభుత్వ ఆమోదం లభించే వరకు వీటికి సంబంధించిన కొన్ని అంశాల విషయంలో గోప్యత పాటించాల్సి ఉంటుందని, అందువల్ల పూర్తి వివరాలు అందించలేక పోతున్నామని అయన అన్నారు.

ముఖ్యమంత్రి రేవంత్ రెడ్డి సూచనల మేరకు జేబీఎస్ ను ఒక అంతర్జాతీయ హబ్ గా తీర్చిదిద్దడంతో పాటు డీపీఆర్ లో పలు అంశాలను పొందుపరిచామని తెలిపారు. రూ.19,579 కోట్ల అంచనా వ్యయంతో 86.1 కి.మీ పొడవు గల జేబీఎస్-మేడ్చల్, జేబీఎస్-శామీర్ పేట్, ఎయిర్ పోర్ట్ ఫ్యూచర్ సిటీ మెట్రో ఫేజ్-II (బి) కారిడార్ల ప్రతిపాదనలతో డీపీఆర్ లను పూర్తి చేయడం జరిగిందని అయన వెల్లడించారు. జేబీఎస్ స్టేషన్ - మేడ్చల్ మార్గం 24.5 కిలోమీటర్లు, 18 స్టేషన్లతో పూర్తి ఎలివేటెడ్ కారిడార్ గా ఉంటుందని తెలిపారు. అలాగే జేబీఎస్ స్టేషన్ - శామీర్‌పేట్ మార్గం 22 కిలోమీటర్ల కారిడార్ 14 స్టేషన్లతో నిర్మాణం అవుతుందని చెప్పారు. ఈ మార్గం 20.35 కి. మీ ఎలివేటెడ్ గాను, 1.65 కిలోమీటర్లు భూగర్భ మార్గం గాను ఉంటుందన్నారు. హకీంపేట విమానాశ్రయం సమీపంలో ఈ భూగర్భ మార్గం ఉంటుందని మెట్రో ఎండీ చెప్పారు.

ఆర్జీఐఏ-ఫ్యూచర్ సిటీ (స్కిల్ యూనివర్సిటీ) 39.6 కిలోమీటర్లుండగా దీనిలో ఎయిర్ పోర్ట్ నుండి 1.5 కి.మీ భూగర్భ మార్గం గాను 21 కి. మీ ఎలివేటెడ్ గాను, 17 కి.మీలు ఎట్ గ్రేడ్ గాను ఉంటుందన్నారు. ఇది శంషాబాద్ అంతర్జాతీయ విమానాశ్రయం నుండి పెద్ద గోల్కొండ, రావిర్యాల్ మీదుగా స్కిల్స్ యూనివర్సిటీ వరకు ఉంటుందని తెలిపారు. కేంద్ర ప్రభుత్వ మార్గదర్శకాలు, ఇతర రాష్ట్రాలలో మెట్రో రైల్ నిర్మాణ అంచనాలు, హైదరాబాద్ లో ట్రాఫిక్ అవసరాలను దృష్టిలో పెట్టుకొని రెండవ దశ (బి) డీపీఆర్ లను సమగ్రంగా రూపొందించి రాష్ట్ర ప్రభుత్వానికి సమర్పించడం జరిగిందని ఆయన స్పష్టం చేశారు. రాష్ట్ర ప్రభుత్వం ఈ డీపీఆర్ లను ఆమోదించి, కేంద్రానికి సమర్పించాక పూర్తి వివరాలు వెల్లడిస్తామని ఆయన తెలిపారు.