మదీనా చౌరస్తాలో భారీ అగ్నిప్రమాదం.. రంగంలోకి 8 ఫైరింజన్లు
దిశ, వెబ్డెస్క్/చంపాపేట్: చారిత్రాత్మక పాతబస్తీలోని ప్రముఖ వ్యాపార కేంద్రమైన మదీనా చౌరస్తాలో గురువారం భారీ అగ్నిప్రమాదం సంభవించింది. మదీనా ప్రాంతంలోని ఎస్వీజే కాంప్లెక్స్లో ఉన్న ఓ వస్త్ర దుకాణంలో అకస్మాత్తుగా మంటలు చెలరేగడంతో ఆ ప్రాంతమంతా దట్టమైన పొగ కమ్ముకుంది. వస్త్ర వ్యాపారానికి, షాపింగ్కు ఓల్డ్ సిటీ అత్యంత ప్రసిద్ధి చెందిన ప్రాంతం కావడంతో.. ఈ ప్రమాదం స్థానికంగా తీవ్ర కలకలం రేపింది. దుకాణంలో భారీగా ఉన్న బట్టల స్టాక్ కారణంగా మంటలు క్షణాల్లోనే ఉధృత రూపం దాల్చాయి. అగ్నికీలలు ఎంతకీ అదుపులోకి రాకపోవడంతో ఆ ప్రాంతమంతా దట్టమైన పొగలు కమ్ముకున్నాయి.
ప్రమాద సమాచారం అందిన వెంటనే అగ్నిమాపక సిబ్బంది 8 ఫైరింజన్లతో ఘటనా స్థలానికి చేరుకుని సహాయక చర్యలు చేపట్టారు. గత రెండు గంటలుగా ఫైర్ సిబ్బంది నిరంతరాయంగా శ్రమిస్తూ మంటలను అదుపు చేసే ప్రయత్నం చేస్తున్నారు. మంటలు దుకాణం గ్రౌండ్ ఫ్లోర్కు కూడా వ్యాపించగా, అగ్నిమాపక సిబ్బంది అప్రమత్తమై అక్కడ మంటలను ఆర్పివేశారు. అయితే, మదీనా చౌరస్తాలో దుకాణాలు అత్యంత దగ్గరదగ్గరగా ఉండటంతో.. ప్రమాదం జరిగిన షాప్ నుండి పక్కనే ఉన్న ఇతర దుకాణాలకు కూడా మంటలు వ్యాపించే ప్రమాదం పొంచి ఉండటం తీవ్ర ఆందోళన కలిగిస్తోంది. ఇప్పటికే పక్క షాపులకు మంటలు పాకాయా లేదా అనే విషయాలు ఇంకా స్పష్టంగా తెలియాల్సి ఉంది.
మరోవైపు పోలీసులు ఘటనా స్థలానికి చేరుకుని పరిస్థితిని నిరంతరం సమీక్షిస్తున్నారు. ప్రమాద తీవ్రత దృష్ట్యా చౌరస్తా పరిసర ప్రాంతాల్లో ట్రాఫిక్ను క్రమబద్ధీకరించారు. అయితే, ప్రమాదం జరిగిన సమయంలో దుకాణం లోపల ఎవరూ లేరని, దీంతో ప్రాణనష్టం తప్పిందని పోలీసులు ప్రాథమికంగా వెల్లడించారు. మంటలను పూర్తిగా అదుపులోకి తెచ్చేందుకు ఫైర్ సిబ్బంది ప్రయత్నిస్తున్నారు. ఈ ప్రమాదానికి గల కారణాలు, జరిగిన ఆస్తి నష్టం వివరాలు ఇంకా తెలియాల్సి ఉంది.
వరుస అగ్నిప్రమాదాలతో ఆందోళన.. భద్రతా ప్రమాణాలపై ప్రశ్నలు
ఇటీవలి కాలంలో పాతబస్తీ ప్రాంతంలో వరుసగా అగ్నిప్రమాదాలు చోటుచేసుకోవడం స్థానికుల్లో ఆందోళన కలిగిస్తోంది. వాణిజ్య సముదాయాల్లో అగ్నిమాపక భద్రతా ప్రమాణాలు సక్రమంగా అమలవుతున్నాయా? విద్యుత్ వ్యవస్థల నిర్వహణ ఎలా ఉంది? అనే ప్రశ్నలు మళ్లీ తెరపైకి వస్తున్నాయి. ప్రమాదాలు పునరావృతం కాకుండా అధికారులు కఠిన తనిఖీలు నిర్వహించి, భద్రతా నిబంధనలు పాటించని వాణిజ్య సముదాయాలపై చర్యలు తీసుకోవాలని ప్రజలు కోరుతున్నారు.
