జిల్లాలో ఈ నెలరోజులు పోలీస్ యాక్ట్ అమలు : ఎస్పీ జానకి

దిశ, మహబూబ్ నగర్ ప్రతినిధి : శాంతి భద్రతల పరిరక్షణలో భాగంగా ఆదివారం నుండి ఈనెల 31 సాయంత్రం 6 గంటల వరకు మహబూబ్ నగర్ జిల్లాలో '30, 30(ఏ) పోలీస్ యాక్ట్-1861' లోని నిబంధనలు అమలులో ఉంటాయని ఎస్పీ జానకి తెలిపారు. ఈ నిబంధనల కాలంలో పోలీస్ శాఖ ముందస్తు అనుమతి లేకుండా జిల్లా ప్రజలు, ప్రజాప్రతినిధులు వివిధ సంఘాల నాయకులు ధర్నాలు, రాస్తారోకో, నిరసనలు, ర్యాలీ లు, పబ్లిక్ మీటింగులు, సభలు, పెద్ద ఎత్తున నిర్వహించే సమావేశాలు, ఊరేగింపులు లాంటివి చేపట్టకూడదని ఎస్పీ హెచ్చరించారు. శాంతి భద్రతలకు భంగం కలిగించే విధంగా, ప్రజాధనానికి నష్టం కలిగించే ఎలాంటి చట్టవ్యతిరేక కార్యకలాపాలు చేపట్టకూడదని ఆమె ఆదేశించారు. పోలీసు ఉన్నతాధికారుల అనుమతి లేకుండా పై చర్యలకు పాల్పడితే సంబంధింత వ్యక్తులపై చట్టపరమైన కఠిన చర్యలు తీసుకుంటామని ఎస్పీ జానకి హెచ్చరించారు.