22 ఏళ్ల తర్వాత మిత్రుల కలయిక!
‘న్యూస్కాలర్ కాన్వెంట్ స్కూల్’ 2004 ఏడో తరగతి బ్యాచ్ విద్యార్థులు సుదీర్ఘ కాలం తర్వాత ఒకే వేదికపైన కలిసి పాత జ్ఞాపకాలు నెమరువేసుకున్నారు.
దిశ, బూర్గంపాడు: కాల చక్రం ఎంత వేగంగా తిరిగినా, జీవిత ప్రయాణంలో ఎన్ని మలుపులు వచ్చినా.. నిఖార్సైన బాల్య స్నేహం ఎప్పటికీ చెరిగిపోదని మరోసారి నిరూపితమైంది. బూర్గంపాడు మండలం మొరంపల్లి బంజర్కు చెందిన ‘న్యూస్కాలర్ కాన్వెంట్ స్కూల్’ 2004 ఏడో తరగతి బ్యాచ్ విద్యార్థులు సుదీర్ఘ కాలం తర్వాత ఒకే వేదికపైకి వచ్చారు. దాదాపు 22 సంవత్సరాల సుదీర్ఘ విరామం అనంతరం వారంతా ప్రకృతి రమణీయత ఉట్టిపడే పాములేరు వేదికగా ప్రత్యేక ‘గెట్ టు గెదర్’ కార్యక్రమాన్ని ఆదివారం ఏర్పాటు చేసుకుని చిన్ననాటి మధుర అనుభూతులను నెమరువేసుకున్నారు.
బిజీ జీవితాల్లో ‘పాత జ్ఞాపకాల’ పిలుపు
ఒకప్పుడు స్కూల్ యూనిఫాంతో క్లాస్ రూమ్లలో కలిసి చదువుకుని, స్కూల్ గ్రౌండ్లో ఆడిపాడిన ఆనాటి చిచ్చరపిడుగులు.. నేడు సమాజంలో వివిధ రంగాలలో స్థిరపడ్డారు. ఉద్యోగాలు, వ్యాపారాలు, కుటుంబ బాధ్యతలతో తమ తమ బిజీ జీవితాలు గడుపుతున్నప్పటికీ, పాత జ్ఞాపకాల పిలుపుతో అందివచ్చిన అవకాశాన్ని వదులుకోలేదు. పనులన్నింటికీ కాసేపు విరామం ఇచ్చి,మిత్రుల పిలుపు అందుకొని పాములేరు తీరానికి చేరుకున్నారు. అందరూ ఒకేచోట చేరి భావోద్వేగ క్షణాలను పంచుకున్నారు.
గురువుల జ్ఞాపకాలు.. మిత్రుల ఆటపట్టించడం
దాదాపు రెండు దశాబ్దాల తర్వాత కలుసుకోవడంతో అందరిలోనూ చిన్నపిల్లల ఉత్సాహం కనిపించింది. ఆనాటి స్కూల్ రోజుల సరదా సంఘటనలు, హోంవర్క్ చేయనప్పుడు గురువులు వేసిన శిక్షలు,తమకు విద్యాబుద్ధులు నేర్పిన ఉపాధ్యాయుల జ్ఞాపకాలను ఒక్కొక్కరుగా గుర్తుచేసుకుంటూ ఆనంద డోలికల్లో మునిగిపోయారు. ఒకరినొకరు ఆటపట్టించుకుంటూ, పాత ముచ్చట్లతో రోజంతా ఎంతో హుషారుగా గడిపారు. ఈ అపురూప కలయిక చూస్తే.. కాలం గడిచినా, వయస్సు పెరిగినా స్వచ్ఛమైన స్నేహ బంధానికి ఎప్పటికీ వృద్ధాప్యం రాదని స్పష్టమవుతోంది.కాలం గడిచినా,వయస్సు పెరిగినా స్వచ్ఛమైన స్నేహ బంధానికి ఎప్పటికీ వృద్ధాప్యం రాదని స్పష్టమవుతోంది.
ప్రతి ఒక్కరి జీవితంలో ఒక మరపురాని..
బంధాన్ని మరింత బలోపేతం చేసుకునేలా..ఈ ఆత్మీయ సమ్మేళనంలో భాగంగా మిత్రులంతా పరస్పరం తమ కుటుంబ సభ్యులను ఒకరికొకరు పరిచయం చేసుకున్నారు.కేవలం ఇక్కడితోనే ఆగిపోకుండా, భవిష్యత్తులోనూ ఇలాంటి సమావేశాలు నిరంతరం నిర్వహిస్తూ.. కష్టసుఖాల్లో తోడుంటూ ఈ స్నేహబంధాన్ని మరింత బలోపేతం చేసుకోవాలని ఏకగ్రీవంగా నిర్ణయించుకున్నారు. స్నేహం, ఆత్మీయత, అనుబంధాలకు ప్రతీకగా నిలిచిన ఈ గెట్ టు గెదర్ వేడుక ప్రతి ఒక్కరి జీవితంలో ఒక మరపురాని మధుర జ్ఞాపకంగా మిగిలిపోయింది. ఈ అపురూప వేడుకలో భాగ్యలక్ష్మి, రాజేశ్వరి, ధనలక్ష్మి, సంధ్యారాణి, చంద్రశేఖర్ రెడ్డి, మౌనిక, శైలజ, అనంత్, శ్రవణ్, చంటి, రఘురామిరెడ్డి, కృష్ణారెడ్డి, హేమంత్, రాజశేఖర్ రెడ్డి, ఉమాశంకర్ రెడ్డి, ముకుందారెడ్డి, లక్ష్మీరెడ్డి తదితర క్లాస్మేట్స్ అందరూ పాల్గొని సందడి చేశారు.
