రైతు నేస్తం పేరుతో మొక్కుబడి తంతు..!

దిశ:పాల్వంచ టౌన్ ; రైతులకు శాస్త్రీయ వ్యవసాయ పద్ధతులు, ఆధునిక సాంకేతిక పరిజ్ఞానం, పంటల యాజమాన్యం, మార్కెట్ పరిస్థితులు, ప్రభుత్వ పథకాలపై అవగాహన కల్పించేందుకు రాష్ట్ర ప్రభుత్వం అత్యంత ప్రతిష్టాత్మకంగా చేపట్టిన రైతు నేస్తం వీడియో కాన్ఫరెన్స్ కార్యక్రమం పాల్వంచ మండలంలో అధికారుల నిర్లక్ష్యానికి బలవుతోందనే విమర్శలు వ్యక్తమవుతున్నాయి. రైతులను వ్యవసాయ శాస్త్రవేత్తలు, ఉన్నతాధికారులు, మంత్రులతో అనుసంధానం చేసి వ్యవసాయ రంగంలో నూతన మార్పులను పరిచయం చేయాల్సిన కార్యక్రమం క్షేత్రస్థాయిలో మాత్రం మొక్కుబడిగా మారిందని రైతులు ఆవేదన వ్యక్తం చేస్తున్నారు. అధికారిక గణాంకాల ప్రకారం పాల్వంచ మండలంలో 6,977 మంది పట్టాదారు రైతులు, 1,254 మంది పట్టాదారు పాస్‌బుక్ లేని రైతులు కలిపి మొత్తం 8,231 మంది రైతులు ఉన్నారు. వీరి ఆధీనంలో 24,652 ఎకరాల సాగుభూమి ఉంది. ఇంత పెద్ద సంఖ్యలో రైతులు ఉన్న మండలంలో రైతుల కోసం ప్రత్యేకంగా నిర్వహిస్తున్న కార్యక్రమానికి స్పందన లేకపోవడం ఆందోళన కలిగిస్తోంది. మండలంలో నాలుగు క్లస్టర్ల పరిధిలో రైతులను అనుసంధానం చేస్తూ రైతు వేదికలను ఏర్పాటు చేశారు. పాండురంగాపురం, పుల్లాయిగూడెం, జగన్నాథపురం ,బంజర రైతు వేదికలకు విద్యుత్, వీడియో కాన్ఫరెన్స్ సదుపాయాలు కల్పించారు. ప్రతి మంగళవారం రైతు నేస్తం కార్యక్రమం నిర్వహించి రైతులకు నూతన వ్యవసాయ సాంకేతికతలు, పంటల నిర్వహణ, ప్రభుత్వ పథకాలపై అవగాహన కల్పించాల్సి ఉంది.అయితే ప్రస్తుతం జగన్నాథపురం, పుల్లాయిగూడెం రైతు వేదికల్లో మాత్రమే రైతు నేస్తం కార్యక్రమం నిర్వహిస్తున్నారు.

రైతు వేదికలు ప్రస్తుతం దొంగలకు అడ్డాలుగా మారాయా..?

పాండురంగాపురం రైతు వేదికలో ఏర్పాటు చేసిన ఎల్ఈడీ స్క్రీన్, వీడియో కాన్ఫరెన్స్ పరికరాలు దొంగల పాలవడంతో అక్కడ కార్యక్రమం పూర్తిగా నిలిచిపోయింది. ప్రభుత్వ నిధులతో ఏర్పాటు చేసిన కీలక పరికరాలు మాయమైనా వాటి స్థానంలో కొత్తవి ఏర్పాటు చేయడంలో అధికారుల నిర్లక్ష్యం స్పష్టంగా కనిపిస్తోందని రైతులు విమర్శిస్తున్నారు.ఇక పుల్లాయిగూడెం రైతు వేదిక పరిస్థితి మరింత దయనీయంగా మారింది. అక్కడ ఏర్పాటు చేసిన నాలుగు ఫ్యాన్లు కూడా దొంగల పాలైనట్లు అధికారులు చెబుతున్నారు. ఒకవైపు వీడియో కాన్ఫరెన్స్ పరికరాలు, మరోవైపు ఫ్యాన్లు వరుసగా దొంగతనాలకు గురవుతుండటంతో రైతు వేదికలు వ్యవసాయ అవగాహన కేంద్రాలుగా కాకుండా అనాథ భవనాలుగా మారిపోయాయనే విమర్శలు వ్యక్తమవుతున్నాయి.“రైతులకు అవగాహన కల్పించాల్సిన రైతు వేదికలు ప్రస్తుతం దొంగలకు అడ్డాలుగా మారాయా..?” అనే ప్రశ్నలు రైతుల నుంచి వినిపిస్తున్నాయి. కోట్ల రూపాయల ప్రజాధనంతో ఏర్పాటు చేసిన ఆస్తులు వరుసగా దొంగల పాలవుతుంటే వాటి భద్రతపై సంబంధిత అధికారులు ఏం చేస్తున్నారనే ప్రశ్నలు తలెత్తుతున్నాయి.అయితే ఈ కార్యక్రమంలో అత్యంత ఆశ్చర్యకరమైన విషయం ఏమిటంటే 8,231 మంది రైతులు ఉన్న మండలంలో రైతు నేస్తం కార్యక్రమానికి మొత్తం హాజరైనది కేవలం ఆరుగురు రైతులు మాత్రమే. వేలాది మంది రైతులు ఉన్న ప్రాంతంలో ప్రభుత్వం ప్రత్యేకంగా నిర్వహిస్తున్న కార్యక్రమానికి ఆరుగురు మాత్రమే హాజరవడం వ్యవసాయ శాఖ పనితీరుపై తీవ్ర సందేహాలకు తావిస్తోంది.ఇంకా ఆశ్చర్యకరమైన విషయం ఏమిటంటే పుల్లాయిగూడెం రైతు వేదికలో ఒక్క రైతు కూడా హాజరు కాలేదని సమాచారం. రైతులకు కార్యక్రమం గురించి ముందస్తు సమాచారం ఇవ్వకపోవడమే దీనికి ప్రధాన కారణమని రైతులు ఆరోపిస్తున్నారు.

వ్యవసాయ అవగాహన కేంద్రాలా..? లేక అనాథ భవనాలా..?”

పాల్వంచ మండల వ్యవసాయ శాఖ అధికారి వివరణ : శంభోశంకర్

రైతు నేస్తం” కార్యక్రమం కొత్తది కాదని, ప్రతి మంగళవారం క్రమం తప్పకుండా జరుగుతున్న కార్యక్రమమేనని మండల వ్యవసాయ అధికారి స్పష్టం చేశారు. ఈ కార్యక్రమానికి సంబంధించి ప్రత్యేకంగా కొత్తగా సమాచారం ఇవ్వాల్సిన అవసరం లేదని, ఇప్పటికే రైతులకు పూర్తి అవగాహన ఉందని ఆయన పేర్కొన్నారు. “ప్రతి మంగళవారం ఈ కార్యక్రమం జరుగుతుంది. రైతులకు ముందే తెలుసు. వారు స్వయంగా హాజరవుతారు. మా ఏఈవో లు అందరూ ఏర్పాట్లు చూసుకుంటున్నారు” అని ఆయన వివరించారు.కార్యక్రమం నిర్వహణలో ఎటువంటి కొత్త నిర్ణయం లేదా మార్పు లేదని, సాధారణంగా కొనసాగుతున్న విధంగానే సమావేశాలు జరుగుతున్నాయని అధికారులు తెలిపారు. రైతుల భాగస్వామ్యంతోనే ఈ కార్యక్రమం విజయవంతంగా కొనసాగుతోందని ఆయన చెప్పారు.