నటుడు ప్రకాష్ రాజ్‌పై పోలీసులకు ఫిర్యాదు చేసిన కరాటే కళ్యాణి

దిశ, వెబ్‌డెస్క్: ప్రముఖ నటుడు ప్రకాష్ రాజ్ శ్రీరాముడిని, హిందూ ధర్మాన్ని కించపరిచే విధంగా మాట్లాడారంటూ సినీ నటి కరాటే కళ్యాణి పంజాగుట్ట పోలీస్ స్టేషన్‌లో ఫిర్యాదు చేశారు. హిందువుల మనోభావాలను దెబ్బతీసేలా ప్రకాష్ రాజ్ ప్రవర్తిస్తున్నారని ఆమె తన ఫిర్యాదులో పేర్కొన్నారు. ఫిర్యాదు అనంతరం మీడియాలో మాట్లాడిన కరాటే కళ్యాణి, ప్రకాష్ రాజ్ వైఖరిపై తీవ్రస్థాయిలో విరుచుకుపడ్డారు. హిందువుల జోలికి, ముఖ్యంగా రామాయణం జోలికి వస్తే చూస్తూ ఊరుకోం. మా సత్తా ఏంటో ప్రకాష్ రాజ్‌కు త్వరలోనే చూపిస్తాం అని ఆమె హెచ్చరించారు. ప్రకాష్ రాజ్ నటించిన సినిమాలు భవిష్యత్తులో ఎలా ఆడతాయో చూస్తామని, ఆయన సినిమాలను ప్రేక్షకులు ఆదరించకూడదనే అర్థం వచ్చేలా ఆమె సవాల్ విసిరారు. హిందూ దేవుళ్లను లక్ష్యంగా చేసుకుని కొందరు సెలబ్రిటీలు ఇష్టానుసారంగా మాట్లాడటం ఫ్యాషన్‌గా మారిందని ఆమె అసహనం వ్యక్తం చేశారు. ప్రకాష్ రాజ్ తన వ్యాఖ్యలను వెనక్కి తీసుకోవాలని, లేదంటే నిరసనలు ఉధృతం చేస్తామని హెచ్చరించారు. పంజాగుట్ట పోలీసులు ఈ ఫిర్యాదును స్వీకరించి, దీనిపై విచారణ జరిపి తగిన చర్యలు తీసుకుంటామని హామీ ఇచ్చారు. ప్రకాష్ రాజ్ చేసిన వ్యాఖ్యలపై సోషల్ మీడియాలో కూడా పెద్ద ఎత్తున చర్చ జరుగుతోంది. ఈ వివాదం సినీ పరిశ్రమలో ఎలాంటి మలుపు తీసుకుంటుందో వేచి చూడాలి.