పోక్సో చ‌ట్టం.. బాలిక‌, త‌ల్లిదండ్రుల వివ‌రాలు బ‌య‌ట‌పెడితే క‌ఠిన చ‌ర్య‌లు

దిశ, సిటీక్రైం : పోక్సో చట్టం కేసులో బాలిక, ఆమె తల్లిదండ్రుల వివరాలను సోషల్ మీడియాలో పోస్టు చేసిన వ్యవహారం పై పేట్ బషీరాబాద్ పోలీసులు కేసును నమోదు చేశారు. పోలీసులు వెల్లడించిన వివరాల ప్రకారం...పేట్ బషీరాబాద్ పోలీసు స్టేషన్ లో నమోదైన 684/2026 ఎఫ్ఐఆర్ నెం. లో బాలిక, ఆమె తల్లిదండ్రుల వివరాలు సోషల్ మీడియాలో ప్రసారమవుతున్నాయని మేడ్చల్ మల్కాజిగిరి జిల్లా బాలల సంక్షేమ కమిటీ చైర్ పర్సన్ ఇచ్చిన ఫిర్యాదు పై పేట్ బషీరాబాద్ పోలీసులు 706/2026 ఎఫ్ఐఆర్ ను నమోదు చేశారు. ఈ ఎఫ్ఐఆర్ లో జువెనైల్ జస్టీస్ యాక్ట్ 74, 72(1) బీఎన్ఎస్, సెక్షన్ 23 పోక్సో చట్టం కింద అభియోగాలను నమోదు చేశారు. ఈ పోస్టులను చేసిన వారిని గుర్తించి వారి పై చట్టపరమైన చర్యలను తీసుకుంటామని పోలీసులు తెలిపారు. పోక్సో కేసుల్లో బాధిత బాలిక, తల్లిదండ్రుల వివరాలను బహిర్గతం చేయడం చట్ట ఉల్లంఘన అవుతుందని పోలీసులు స్పష్టం చేశారు. ఈ నేపథ్యంలో ఇలాంటి చర్యలకు పాల్పడే వారి పై చట్టపరంగా కఠిన చర్యలు తీసుకుంటామని పోలీసులు హెచ్చరించారు.