గూగుల్ మ్యాప్స్లో హైదరాబాద్ మెట్రో రియల్ టైమ్ సేవలు.. ప్రయాణికులకు ప్రయోజనాలు ఇవే!
హైదరాబాద్ నగర ప్రయాణికులకు మెట్రో రైల్ అధికారులు మరింత సౌకర్యాన్ని అందించారు.
దిశ, డైనమిక్ బ్యూరో: హైదరాబాద్ నగర ప్రయాణికులకు మెట్రో రైల్ అధికారులు మరింత సౌకర్యాన్ని అందించారు. మెట్రో రైల్ డేటాను గూగుల్ మ్యాప్స్కు అనుసంధానించడం ద్వారా రియల్టైమ్ ట్రైన్ సమాచారం ఇప్పుడు అందుబాటులోకి వచ్చింది. ఈ సేవల ద్వారా నగర వాసులు తమ ప్రయాణాలు మరింత సులభంగా, సమయోచితంగా ప్లాన్ చేసుకునే అవకాశం లభించింది. ఈ మేరకు మంగళవారం ఎక్స్ వేదికగా @HMRLHydmetro హైదరాబాద్ మెట్రో వివరాలు పోస్ట్ చేసింది. ట్వీట్ ఇదే..
గూగుల్ మ్యాప్స్లో ప్రయాణికులకు ప్రయోజనాలు ఇవే..
• రియల్టైమ్ నెక్ట్స్ ట్రైన్ సమాచారం: ప్లాట్ఫారమ్కి చేరుకునే ముందే తదుపరి రైలు ఎప్పుడు వస్తుందో సులభంగా తెలుసుకోవచ్చు.
• పాయింట్-టు-పాయింట్ ప్రయాణ ప్రణాళిక: గూగుల్ మ్యాప్స్ సహాయంతో గమ్యస్థానానికి వేగవంతమైన మార్గాలు, సమీప స్టేషన్లు, అంచనా ప్రయాణ సమయం వంటి వివరాలు పొందవచ్చు.
• షెడ్యూల్ మార్పులపై ఆటో అప్డేట్లు: ప్రయాణ మధ్యలో ఎదురయ్యే ఏ ఆలస్యమైనా ముందుగానే తెలియజేయడం ద్వారా అనవసరమైన వేచిచూడు తగ్గుతుంది.
• ఇంటర్చేంజ్ మార్గదర్శకంతో స్మార్ట్ రూట్ ఆప్షన్స్: మార్పిడి స్టేషన్లు, మెరుగైన మార్గాలు, వేగవంతమైన కనెక్షన్ల గురించి స్పష్టమైన సమాచారం పొందవచ్చు. కాగా, ఈ డిజిటల్ ఇంటిగ్రేషన్ ద్వారా హైదరాబాద్ మెట్రో ప్రయాణం మరింత ఆధునికంగా, సౌకర్యవంతంగా మారిందని మెట్రో ప్రయాణికులు అభిప్రాయపడుతున్నారు.
