దక్షిణ మధ్య రైల్వేలో ‘ఎంప్లాయ్ ఆఫ్ ది మంత్’ అవార్డులు

దిశ, సికింద్రాబాద్ : దక్షిణ మధ్య రైల్వే రైలు నిర్వహణలో భద్రతపై తన కట్టుబాటును మరింత బలోపేతం చేస్తూ, మంగళవారం సికింద్రాబాద్‌లోని రైల్ నిలయంలో విస్తృత సమీక్ష సమావేశాన్ని నిర్వహించారు. ఈ సందర్భంగా దక్షిణ మధ్య రైల్వే జనరల్ మేనేజర్ సంజయ్ కుమార్ శ్రీవాస్తవ, అసురక్షిత పరిస్థితులను ముందుగా గుర్తించి నివారించడంలో అప్రమత్తత, నిబద్ధత ప్రదర్శించిన పన్నెండు మంది ఉద్యోగులకు ‘ఎంప్లాయ్ ఆఫ్ ది మంత్’ అవార్డులు ప్రదానం చేశారు. సమావేశంలో అదనపు ప్రధాన అధికారి సత్య ప్రకాశ్, వివిధ విభాగాల ప్రధానాధికారులు పాల్గొన్నారు. సికింద్రాబాద్, హైదరాబాద్, విజయవాడ, గుంతకల్, గుంటూరు, నాందేడ్ డివిజన్ డి.ఆర్.ఎమ్‌లు వీడియో కాన్ఫరెన్స్ ద్వారా హాజరయ్యారు. స్టేషన్ మాస్టర్లు, లోకో పైలట్లు, పాయింట్స్‌మన్, కీ-మ్యాన్ వంటి కీలక బాధ్యతలు నిర్వహించే సిబ్బందికి ఈ భద్రతా అవార్డులు అందజేశారు. అవార్డులు సికింద్రాబాద్ విభాగానికి చెందిన ముగ్గురు, గుంటూరు విభాగానికి ఇద్దరు, విజయవాడ విభాగానికి ఇద్దరు, గుంతకల్ విభాగానికి ఐదుగురికి ప్రదానం చేయబడ్డాయి. అవార్డు గ్రహీతలను జనరల్ మేనేజర్ అభినందిస్తూ, అంకితభావంతో విధులు నిర్వహించినందుకు ప్రశంసించారు. ఈ అవార్డులు ఇతర ఉద్యోగుల్లో అప్రమత్తత పెంచి, రైలు నిర్వహణలో భద్రతా ప్రమాణాలను కచ్చితంగా పాటించేలా ప్రోత్సహిస్తాయని తెలిపారు. అనవసర అంచనాలు, నిర్లక్ష్యం అనుకోని ప్రమాదాలకు దారితీస్తాయని సంజయ్ కుమార్ శ్రీవాస్తవ హెచ్చరించారు. సులభ మార్గాలు అనుసరించకుండా విధి నియమాలను కచ్చితంగా పాటించాలని సూచించారు. అధికారులు, పర్యవేక్షకులు క్రమం తప్పకుండా భద్రతా తనిఖీలు నిర్వహించాలని ఆదేశించారు. పనిస్థలాలు, నిర్మాణ ప్రాంతాల్లో అకస్మాత్తు తనిఖీలు చేసి భద్రతా నిబంధనలు అమలవుతున్నాయో లేదో నిర్ధారించాలని తెలిపారు. పనిస్థల భద్రత విషయంలో ఎలాంటి రాజీ ఉండకూడదని స్పష్టం చేశారు.