హైదరాబాద్‌లో భారీ శబ్దంతో పేలుడు

దిశ, డైనమిక్ బ్యూరో: హైదరాబాద్‌లో భారీ శబ్దంతో సంభవించిన పేలుడు తీవ్ర కలకలం రేపింది. బండ్లగూడలో ఓ కెమికల్ డబ్బా పేలడంతో ఓ వ్యక్తికి తీవ్ర గాయాలయ్యాయి. ఆదివారం షకీల్ అనే వ్యక్తి బండ్లగూడ ప్రాంతంలో చెత్తను సేకరిస్తుండగా అతడికి ఓ కెమికల్ డబ్బా కనిపించింది. ఆ డబ్బాను ఓపెన్ చేసి చూసే ప్రయత్నం చేయగా ఒక్కసారిగా భారీ పేలుడు సంభవించింది. పేలుడు ధాటికి పక్కనే ఉన్న భవనాల అద్ధాలు ధ్వంసం అయ్యాయి. ఈ ఘటనలో షకీల్ తీవ్రంగా గాయపడ్డాడు. విషయం తెలుసుకుని అక్కడికి చేరుకున్న పోలీసులు గాయపడిన షకీల్‌ను ఆసుపత్రికి తరలించారు. ఈ ఘటనలో అసలేం జరిగింది అనే కోణంలో దర్యాప్తు ప్రారంభించారు.