తెలుగమ్మాయి గ్లోబల్ ఫ్యాషన్ ఐకాన్‌.. ప్రతిష్టాత్మక 'ఛానెల్' బ్రాండ్ హౌస్ అంబాసిడర్‌గా హైదరాబాదీ!

దిశ, డైనమిక్ బ్యూరో: అంతర్జాతీయ ఫ్యాషన్ రంగంలో భారత కీర్తి పతాకాన్ని ఎగురవేస్తూ, ఒక తెలుగు అమ్మాయి సరికొత్త చరిత్ర సృష్టించింది. ప్రపంచ ప్రఖ్యాతి గాంచిన లగ్జరీ ఫ్యాషన్ బ్రాండ్ 'ఛానెల్' (Chanel) 'హౌస్ అంబాసిడర్‌'గా హైదరాబాద్‌కు చెందిన భవితా మండవ నియమితురాలయ్యారు. మార్గోట్ రాబీ, జెన్నీ కిమ్ వంటి అంతర్జాతీయ స్టార్ల సరసన ఒక భారతీయురాలు ఈ గౌరవాన్ని దక్కించుకోవడం ఇదే తొలిసారి కావడం విశేషం.

సబ్‌వే స్టేషన్‌లో మొదలైన ప్రయాణం..

హైదరాబాద్‌లోని ఒక తెలుగు కుటుంబంలో జన్మించిన భవిత మండవ, నగరంలోని జవహర్‌లాల్ నెహ్రూ టెక్నలాజికల్ యూనివర్సిటీ (JNTU)లో ఆర్కిటెక్చర్ పూర్తి చేశారు. అనంతరం ఉన్నత చదువుల కోసం అమెరికా వెళ్లిన ఆమె, న్యూయార్క్ యూనివర్సిటీ (NYU) టండన్ స్కూల్ ఆఫ్ ఇంజనీరింగ్‌లో మాస్టర్స్ చదువుతున్నారు. అయితే, ఒకరోజు బ్రూక్లిన్ సబ్‌వే స్టేషన్‌లో రైలు కోసం వేచి చూస్తున్న సమయంలో ఒక మోడలింగ్ ఏజెంట్ కంట పడటంతో ఆమె జీవితం మలుపు తిరిగింది.

అంచెలంచెలుగా అంతర్జాతీయ వేదికపైకి..

మోడలింగ్ రంగంలోకి అడుగుపెట్టిన కేవలం రెండు వారాల్లోనే 'బోటెగా వెనెటా' (Bottega Veneta) వంటి పెద్ద బ్రాండ్ కోసం ర్యాంప్ వాక్ చేసే అవకాశం భవితను వరించింది. ఆ తర్వాత న్యూయార్క్‌లో జరిగిన 'ఛానెల్' ఫ్యాషన్ షోను ప్రారంభించిన (Open) తొలి భారతీయ మోడల్‌గా రికార్డు సృష్టించారు. గత జనవరిలో జరిగిన 'హాట్ కోచర్' (Haute Couture) షోలో అందమైన బ్రైడల్ లుక్‌తో షోను ముగించి (Close) అందరినీ ఆకట్టుకుంది. అలాగే ప్రముఖ అంతర్జాతీయ పత్రికలు 'బ్రిటిష్ వోగ్', 'i-D' కవర్ పేజీలపై కూడా ఆమె మెరిశారు.

గర్వంగా ఉంది: భవిత మండవ

ఈ మేరకు భవిత ఇన్‌స్టాగ్రామ్ వేదికగా స్పందిస్తూ.. ‘ఆధునిక శ్రామిక మహిళా చైతన్యానికి ఛానెల్ ఒక నిలువుటద్దం. అటువంటి ప్రతిష్టాత్మక సంస్థలో భాగం కావడం, రాయబారిగా బాధ్యతలు చేపట్టడం నాకు దక్కిన గౌరవంగా భావిస్తున్నాను. ఛానెల్ వారసత్వాన్ని ముందుకు తీసుకెళ్లడం గర్వంగా ఉంది’ అని పేర్కొన్నారు. ప్రస్తుతం ఛానెల్ క్రియేటివ్ డైరెక్టర్ మాథ్యూ బ్లేజీ ఆధ్వర్యంలో భవిత ఈ కొత్త బాధ్యతలను నిర్వహించనున్నారు. ఒక తెలుగమ్మాయి గ్లోబల్ ఫ్యాషన్ ఐకాన్‌గా ఎదగడంపై దేశంతో పాటు తెలుగు రాష్ట్రాల ప్రజలు హర్షం వ్యక్తం చేస్తున్నారు.