దక్షిణాది రాష్ట్రాల ఐక్యతకు రేవంత్ రెడ్డి పిలుపు: తమిళ CM స్టాలిన్కు కీలక లేఖ
నియోజకవర్గాల పునర్విభజన (Delimitation) అంశంపై దేశవ్యాప్తంగా చర్చ ముదురుతున్న వేళ, తెలంగాణ ముఖ్యమంత్రి రేవంత్ రెడ్డి రాజకీయంగా కీలక అడుగు వేశారు.
దిశ, వెబ్డెస్క్: నియోజకవర్గాల పునర్విభజన (Delimitation) అంశంపై దేశవ్యాప్తంగా చర్చ ముదురుతున్న వేళ, తెలంగాణ ముఖ్యమంత్రి రేవంత్ రెడ్డి రాజకీయంగా కీలక అడుగు వేశారు. దక్షిణాది రాష్ట్రాల హక్కుల పరిరక్షణ కోసం అందరూ ఏకం కావాలని పిలుపునిస్తూ, తమిళనాడు ముఖ్యమంత్రి ఎం.కే. స్టాలిన్కు ఆయన ఒక లేఖ రాశారు. ప్రస్తుత జనాభా ప్రాతిపదికన లోక్సభ సీట్ల పెంపు చేపడితే దక్షిణాది రాష్ట్రాలకు భారీ నష్టం జరుగుతుందని రేవంత్ రెడ్డి ఆందోళన వ్యక్తం చేశారు. గత దశాబ్దాలుగా జనాభా నియంత్రణలో అద్భుత ప్రదర్శన కనబరిచిన దక్షిణాది రాష్ట్రాలకు, ఈ విధానం వల్ల పార్లమెంట్లో రాజకీయ ప్రాతినిధ్యం తగ్గే ప్రమాదం ఉందని ఆయన హెచ్చరించారు. దక్షిణాది రాష్ట్రాల గొంతుకను బలంగా వినిపించాల్సిన సమయం వచ్చిందని, మనందరం కలిసి పోరాడాలని రేవంత్ రెడ్డి లేఖలో పేర్కొన్నారు. కేవలం తమిళనాడు, తెలంగాణే కాకుండా ఇతర దక్షిణాది రాష్ట్రాల ముఖ్యమంత్రులతో కూడా సమన్వయం చేసుకుంటూ ఒక ఉమ్మడి కార్యాచరణను రూపొందించాలని ఆయన ప్రతిపాదించారు.
పార్లమెంట్లో గళం వినిపిద్దాం...
డీలిమిటేషన్ అంశాన్ని కేవలం రాష్ట్రాల స్థాయిలోనే కాకుండా, పార్లమెంట్లో కూడా తీవ్రంగా లేవనెత్తాలని రేవంత్ రెడ్డి నిర్ణయించారు. దక్షిణాది రాష్ట్రాల ఎంపీలందరూ కలిసి కేంద్రంపై ఒత్తిడి తీసుకురావాలని ఆయన కోరారు. దక్షిణాది రాష్ట్రాల మధ్య సమన్వయం అత్యంత అవసరం. సీట్ల పెంపు వల్ల దక్షిణాది ప్రాధాన్యత తగ్గే అవకాశం. ఇతర ముఖ్యమంత్రులతో భేటీ అయ్యి ఉమ్మడి పోరాటం చేయడం అవసరం అని రేవంత్ రెడ్డి అభిప్రాయపడ్డారు.
