భద్రతా దృష్ట్యా డ్రోన్‌కు అనుమతి ఇవ్వండి.. CP సజ్జనార్‌కు బీఆర్ఎస్ విజ్ఞప్తి

దిశ, తెలంగాణ బ్యూరో: జూబ్లీహిల్స్ ప్రచారంలో భాగంగా బీఆర్ఎస్ వర్కింగ్ ప్రెసిడెంట్ కేటీఆర్, మాజీ మంత్రి హరీశ్‌రావు రోడ్ షోలకు డ్రోన్ అనుమతి ఇవ్వాలని బీఆర్ఎస్ నేతలు కోరారు. ఈ మేరకు మంగళవారం ఇంటిగ్రేటెడ్ కమాండ్ కంట్రోల్ సెంటర్‌లో హైదరాబాద్ సీపీ సజ్జనార్‌ను కలిశారు. పూర్తిస్థాయి తమ సెక్యూరిటీ ఆధీనంలోనే ఉండేలా డ్రోన్ అనుమతి కోసం సీపీని కలిసినట్లు వారు చెప్పారు. ఈ సందర్భంగా బీసీ కమిషన్ మాజీ సభ్యుడు కిశోర్‌గౌడ్ మాట్లాడుతూ.. పెద్దఎత్తున ప్రజలు, కార్యకర్తలు ఈ ప్రచారానికి వస్తున్న నేపథ్యంలో భద్రతా దృష్ట్యా ప్రచారానికి డ్రోన్లు వాడుకుంటామని తెలియజేసినట్లు తెలిపారు. సీపీ సైతం సానుకూలంగా స్పందించారని చెప్పారు. భయభ్రాంతులకు గురిచేసి పార్టీ పెద్దలైన కేటీఆర్, హరీశ్‌రావుకు ఎలాంటి ఇబ్బంది లేకుండా కార్యకర్తలకు భద్రత కోసం ఈ డ్రోన్లు వినియోగిస్తామని తెలిపారు. ఈ కార్యక్రమంలో నేతలు నాగేందర్‌గౌడ్, దూదిమెట్ల బాలరాజ్ యాదవ్ పాల్గొన్నారు.