పాకిస్తాన్‌కు ఎంఐఎం అధినేత అసదుద్దీన్ వార్నింగ్

దిశ, వెబ్‌డెస్క్: భారత్ - పాకిస్తాన్ సరిహద్దుల్లో ఉద్రిక్త పరిస్థితుల్ని సృష్టించిన పాక్ కు ఎంఐఎం అధినేత, ఎంపీ అసదుద్దీన్ ఒవైసీ (Asaduddin Owaisi) మరోసారి వార్నింగ్ ఇచ్చారు. బహ్రెయిన్‌లో జరిగిన అఖిల పక్ష ఉగ్రవాద వ్యతిరేక కార్యక్రమంలో పాల్గొన్న ఆయన మాట్లాడుతూ.. జమ్మూ కాశ్మీర్‌లోని పహల్గామ్‌లో ఇటీవల జరిగిన హత్యలపై తీవ్ర ఆరోపణలు చేశారు. ప్రజల మతం గురించి అడిగిన తర్వాత హత్య చేయడం అంటే ఇస్లామిక్ బోధనలను వక్రీకరించడమేనన్నారు. పాక్ ఏదైనా దుస్సాహసానికి పాల్పడితే ఊరుకోబోమని హెచ్చరించారు. పాక్ కవ్వింపులకు పూనుకుంటే మరింత దూకుడుగా బదులిచ్చేందుకు భారత్ సిద్ధంగా ఉందన్నారు. ఈసారి ప్రతిదాడులు మామూలుగా ఉండవని, భారత్ ఎదురు దాడికి దిగితే పాక్ నామరూపాల్లేకుండా పోతుందని హెచ్చరించారు. పాకిస్తాన్ కు తగిన బుద్ధి చెప్తామన్నారు.

పాకిస్తాన్ నుండి ఉద్భవిస్తున్న ఉగ్రవాదం లెక్కలేనన్ని భారతీయుల ప్రాణాలను బలిగొందని, ఇస్లామాబాద్ తన మద్దతును ఆపకపోతే అది కొనసాగుతుందని ఒవైసీ గట్టిగా నొక్కి చెప్పారు. "భారతీయుల సహనానికి ఒక పరిమితి ఉంది" అని ఆయన హెచ్చరించారు. పదే పదే రెచ్చగొట్టే చర్యలను ప్రస్తావిస్తూ, "మా ప్రభుత్వం చాలా స్పష్టంగా చెప్పింది - తదుపరి పాకిస్తాన్ అలాంటి దుస్సాహసం చేసినప్పుడు, ప్రతిస్పందన వారు ఆశించిన దానికంటే ఎక్కువగా ఉంటుంది" అని ఆయన పేర్కొన్నారు.

పాకిస్తాన్‌ను ఫైనాన్షియల్ యాక్షన్ టాస్క్ ఫోర్స్ (FATF) గ్రే లిస్ట్‌లో తిరిగి చేర్చేందుకు భారతదేశం చేస్తున్న ప్రయత్నాలకు మద్దతు ఇవ్వాలని ఒవైసీ బహ్రెయిన్ ప్రభుత్వం, ఇతర గల్ఫ్ దేశాలకు దౌత్యపరమైన విజ్ఞప్తి చేశారు. పాకిస్తాన్ ద్వారా వచ్చే నిధులు సిరియాలో ఉగ్రవాద కార్యకలాపాలకు వాడుతున్నారని ఆరోపించారు.

పాకిస్తాన్‌ను తిరిగి FATF గ్రే లిస్ట్‌లోకి తీసుకురావడంలో బహ్రెయిన్ ప్రభుత్వం మాకు సహాయం చేస్తుందని ఆశిస్తున్నట్లు తెలిపారు. జాతీయ సమగ్రత, ఉగ్రవాదంపై పోరాటం విషయానికి వస్తే, రాజకీయ విభేదాలతో సంబంధం లేకుండా మన దేశంలో ఏకాభిప్రాయం ఉందని అసదుద్దీన్ ఒవైసీ అన్నారు.