ట్యాక్స్ పేయర్లకు అలర్ట్!
చాలామంది చివరి రోజు వరకు వేచి చూస్తారు. కానీ అదే సమయంలో ఆదాయపు పన్ను పోర్టల్పై భారీగా ట్రాఫిక్ ఉండే అవకాశం ఉంటుంది.
దిశ, బిజినెస్ బ్యూరో: పన్ను సంబంధిత పనులను ఇప్పటివరకు వాయిదా వేస్తూ వస్తున్నారా? అయితే ఇక ఆలస్యం చేయకండి. జులై నెలలో ఆదాయపు పన్ను చెల్లింపుదారులు తప్పనిసరిగా గుర్తుంచుకోవాల్సిన మూడు కీలక గడువు తేదీలు ఉన్నాయి. టీడీఎస్ జమ చేయడం నుంచి ఆదాయపు పన్ను రిటర్న్ (ఐటీఆర్) దాఖలు వరకు పలు ముఖ్యమైన పనులు ఈ నెలలో పూర్తిచేయాల్సి ఉంటుంది. గడువు దాటితే ఆలస్య రుసుములు, వడ్డీ భారం, అనవసరమైన ఇబ్బందులు ఎదురయ్యే అవకాశం ఉంది. మీరు ఉద్యోగి అయినా, వ్యాపారవేత్త అయినా, కంపెనీ యజమాని అయినా.. ఈ మూడు తేదీలను తప్పకుండా గుర్తుంచుకోవాలి.
జూలై 7: టీడీఎస్ చెల్లింపునకు చివరి తేదీ
ఆదాయపు పన్ను చట్టం 2025 ప్రకారం.. త్రైమాసికంగా టీడీఎస్ జమ చేసేందుకు అసెసింగ్ ఆఫీసర్ అనుమతి పొందినవారు ఏప్రిల్-జూన్ త్రైమాసికానికి సంబంధించిన టీడీఎస్ను ఈ తేదీలోగా జమచేయాలి. అలాగే 2025 జూన్తో ముగిసిన త్రైమాసికంలో స్వీకరించిన కొన్ని నిర్దిష్ట డిక్లరేషన్లు, నిర్ణీత ఫామ్స్ ను కూడా ఈ తేదీలోగా అప్లోడ్ చేయాలి. ప్రభుత్వ శాఖలు, స్టాక్ ఎక్స్ఛేంజీలు, అధీకృత డీలర్లు, ఐఎఫ్ఎస్సీ యూనిట్లు, నాన్ రెసిడెంట్ పెట్టుబడిదారులతో పనిచేసే సంస్థలకు సంబంధించిన కొన్ని ప్రత్యేక రిపోర్టింగ్ నిబంధనలకు కూడా ఈ గడువు వర్తిస్తుంది. ఇది వ్యాపారస్తులు, కంపెనీలు, ఇళ్ల యజమానులు(ఎక్కువ అద్దె వస్తుంటే), జీతాలు ఇచ్చే ఎంప్లాయర్స్, ఫ్రీలాన్సర్లు, కాంట్రాక్టర్లకు వర్తిస్తుంది.
జూలై 30: స్టేట్మెంట్ దాఖలు
జూన్ నెలలో టీడీఎస్ మినహాయించిన ట్యాక్స్ డిడక్టర్లు, నిర్దిష్ట వర్గాలకు సంబంధించిన చలాన్-కమ్-స్టేట్మెంట్ను ఈ తేదీలోగా సమర్పించాలి. వ్యాపార సంస్థలు, కంపెనీలు ముందుగానే తమ లెక్కలు, పన్ను వివరాలను పరిశీలించి స్టేట్మెంట్ను సమయానికి దాఖలు చేయడం మంచిది. చివరి నిమిషంలో తప్పులు జరిగితే జరిమానాలు ఎదురయ్యే అవకాశం ఉంటుంది. ఇది స్థిరాస్తులు కొనుగోలు చేసేవారు, ఇళ్లను అద్దెకు తీసుకునే లగ్జరీ టెనెంట్లు, లేదా నిర్దిష్ట కాంట్రాక్ట్ పేమెంట్లు చేసే వ్యాపారస్తులకు వర్తిస్తుంది.
జూలై 31: ఐటీఆర్ దాఖలుకు చివరి గడువు
ఆర్థిక సంవత్సరం 2025-26 (అసెస్మెంట్ ఇయర్ 2026-27)కు సంబంధించిన ఐటీఆర్-1, ఐటీఆర్-2 ఫారమ్లతో ఆదాయపు పన్ను రిటర్న్ దాఖలు చేయాల్సిన వ్యక్తులకు ఇదే చివరి తేదీ. ఈ గడువులోగా రిటర్న్ దాఖలు చేయకపోతే ఆలస్య రుసుము చెల్లించాల్సి రావచ్చు. అంతేకాదు, కొన్ని సందర్భాల్లో నష్టాలను తదుపరి ఆర్థిక సంవత్సరాలకు క్యారీ ఫార్వర్డ్ చేసుకునే అవకాశం కూడా కోల్పోవచ్చు.
చివరి నిమిషం వరకు వేచి ఉండొద్దు
చాలామంది చివరి రోజు వరకు వేచి చూస్తారు. కానీ అదే సమయంలో ఆదాయపు పన్ను పోర్టల్పై భారీగా ట్రాఫిక్ ఉండే అవకాశం ఉంటుంది. దీంతో వెబ్సైట్ నెమ్మదిగా పనిచేయడం, పత్రాలు సిద్ధంగా లేకపోవడం, సాంకేతిక సమస్యలు ఎదురుకావడం వంటి ఇబ్బందులు రావచ్చు. అందుకే నిపుణులు గడువుకు కొన్ని రోజుల ముందే అన్ని పన్ను పనులు పూర్తి చేయాలని సూచిస్తున్నారు.
ముందుగా పూర్తిచేస్తే లాభమే
జూలై నెల పన్ను చెల్లింపుదారులకు అత్యంత కీలకమైన నెల. టీడీఎస్ చెల్లింపులు, అవసరమైన స్టేట్మెంట్ల దాఖలు, ఆదాయపు పన్ను రిటర్న్ సమర్పణ... ఈ మూడు పనులను సమయానికి పూర్తి చేస్తే జరిమానాలు, వడ్డీ భారం తప్పించుకోవచ్చు. అలాగే ఏవైనా పొరపాట్లు ఉంటే వాటిని సరిదిద్దుకునే అవకాశమూ ఉంటుంది.
