మెస్సీ మాయాజాలం.. తన పేరిట మరో రికార్డు: జోర్డాన్‌పై అర్జెంటీనా ఘన విజయం

దిశ, డైనమిక్ బ్యూరో: (FIFA World Cup 2026) ఫిఫా వరల్డ్‌కప్ 2026లో డిఫెండింగ్ ఛాంపియన్ అర్జెంటీనా (Argentina) తన విజయయాత్రను కొనసాగిస్తోంది. గ్రూప్-జే (Group-J) చివరి మ్యాచ్‌లో (Jordan) జోర్డాన్‌పై 3-1 తేడాతో అర్జెంటీనా ఘన విజయం సాధించి, గ్రూప్ టాపర్‌గా రౌండ్ ఆఫ్ 32కు దూసుకెళ్లింది. ఈ మ్యాచ్‌లో స్టార్ ఆటగాడు లియోనెల్ మెస్సీ (Lionel Messi) మరో అద్భుతమైన ప్రపంచ రికార్డును తన పేరిట లిఖించుకున్నాడు.

చరిత్ర సృష్టించిన మెస్సీ..

కెప్టెన్ మెస్సీకి విశ్రాంతినిచ్చేందుకు కోచ్ లయెనల్ అతడిని ఈ మ్యాచ్‌లో ప్రారంభ లైన్-అప్‌లో దించలేదు. అయితే, సెకండ్ హాఫ్‌లో సబ్‌స్టిట్యూట్‌గా మైదానంలోకి అడుగుపెట్టిన మెస్సీ.. 80వ నిమిషంలో లభించిన ఫ్రీ కిక్‌ను అద్భుతమైన గోల్‌గా మలిచాడు. ఈ గోల్‌తో ప్రపంచకప్ చరిత్రలో వరుసగా 7 మ్యాచ్‌ల్లో గోల్స్ చేసిన మొదటి ఆటగాడిగా మెస్సీ సరికొత్త రికార్డు సృష్టించాడు. ప్రస్తుత టోర్నీలో 6 గోల్స్‌తో గోల్డెన్ బూట్ రేసులో అగ్రస్థానంలో ఉన్న మెస్సీ.. ఓవరాల్‌గా వరల్డ్ కప్‌లో తన గోల్స్ సంఖ్యను 19కి పెంచుకుని, అత్యధిక గోల్స్ చేసిన ఆటగాడిగా తన రికార్డును మరింత సుస్థిరం చేసుకున్నాడు.

రాణించిన అర్జెంటీనా ఆటగాళ్లు..

ఈ మ్యాచ్ కోసం కోచ్ లయెనల్ స్కలోని తుది జట్టులో 9 మార్పులు చేసినప్పటికీ అర్జెంటీనా పూర్తి ఆధిపత్యం చలాయించింది. 19వ నిమిషంలో జియోవాని లో సెల్సో డైరెక్ట్ ఫ్రీ కిక్ ద్వారా జట్టుకు తొలి గోల్ అందించగా, 31వ నిమిషంలో లౌటారో మార్టినెజ్ పెనాల్టీని గోల్‌గా మార్చి ఆధిక్యాన్ని 2-0కి పెంచాడు. ఆ తర్వాత జోర్డాన్ స్టార్ ప్లేయర్ మూసా అల్-తామరి ఒక గోల్ చేసి మ్యాచ్‌లోకి తిరిగి వచ్చే ప్రయత్నం చేసినప్పటికీ, చివర్లో మెస్సీ మెరుపు గోల్‌తో అర్జెంటీనా విజయం ఖరారైంది. తొలిసారి వరల్డ్ కప్ ఆడుతున్న జోర్డాన్ ఈ మ్యాచ్‌లో ఓడిపోయినప్పటికీ టోర్నీ అంతటా మంచి పోరాటపటిమ కనబరిచింది.

రౌండ్ ఆఫ్ 32లో కేప్ వెర్డేతో పోరు..

ఈ మ్యాచ్‌లో బెంచ్ ఆటగాళ్లకు అవకాశం ఇవ్వడంపై కోచ్ స్కలోని సంతోషం వ్యక్తం చేశారు. జట్టులోని ప్రతి ఒక్కరిపై తనకు పూర్తి నమ్మకం ఉందని ఆయన పేర్కొన్నారు. కాగా, రౌండ్ ఆఫ్ 32 నాకౌట్ మ్యాచ్‌లో అర్జెంటీనా.. కేప్ వెర్డే జట్టుతో తలపడనుంది. స్పెయిన్, ఉరుగ్వే వంటి బలమైన జట్లను డ్రాతో అడ్డుకున్న కేప్ వెర్డేను తక్కువ అంచనా వేయలేమని, వారు ఖచ్చితంగా గట్టి పోటీ ఇస్తారని స్కలోని స్పష్టం చేశారు.