HCA కేసును సీబీఐకి అప్పగించాలని పిటిషన్.. హైకోర్ట్ కీలక నిర్ణయం

దిశ, వెబ్ డెస్క్ : హైదరాబాద్ క్రికెట్ అసోసియేషన్ (HCA) కేసును సీబీఐ(CBI)కి అప్పగించాలని కోరుతూ సఫిల్‌గూడ క్రికెట్ క్లబ్ తెలంగాణ హైకోర్టు(High Court)లో రిట్ పిటిషన్ దాఖలు చేసిన సంగతి తెలిసిందే. ఈ పిటిషన్ పై విచారణను మూడు వారాలకు వాయిదా వేసింది న్యాయస్థానం. కాగా ఇదివరకే HCA బాధ్యతలను నిర్వహించేందుకు రిటైర్డ్ జస్టిస్ నవీన్ రావును నియమిస్తూ మధ్యంతర ఉత్తర్వులు జారీ చేసిన హైకోర్టు... ఈ ఉత్తర్వులు మూడు వారాలపాటు అమల్లో ఉంటాయని పేర్కొంది. HCAలో జరిగిన అక్రమాలు, అవినీతి ఆరోపణలపై సీబీఐ(CBI) విచారణ కోరుతూ దాఖలైన ఈ పిటిషన్లో BCCI, CBI, HCAను ప్రతివాదులుగా చేర్చింది సఫిల్‌గూడ క్రికెట్ క్లబ్.

HCA ఆధ్వర్యంలో జరిగిన రాజీవ్ గాంధీ స్టేడియం నిర్మాణం, కానోపీలు, ఫ్లడ్‌లైట్లు వంటి ఒప్పందాలలో రూ. 2-3 కోట్ల నష్టం వాటిల్లినట్లు CID అధికారులు ఇప్పటికే గుర్తించారు. అలాగే జగన్ మోహన్ రావు అక్రమ పద్ధతిలో అధ్యక్షునిగా ఎన్నికయ్యారని కూడా తేల్చింది. వీటన్నిటీ పిటిషన్లో పేర్కొంటూ... రాష్ట్ర స్థాయి దర్యాప్తు సరిపోదని, ఈ కేసును మరింత లోతుగా విచారణ జరపడానికి సీబీఐ విచారణ అవసరమని సఫిల్‌గూడ క్రికెట్ క్లబ్ పేర్కొంది. ఇప్పటికే హైకోర్టు HCAపై ఆర్థిక ఆంక్షలు విధించగా, ఈడీ రూ. 51.29 లక్షల ఆస్తులను జప్తు చేసింది.