ఆరుగురు చిన్నారుల సజీవదహనం

పాట్నా: బీహార్‌లో ఘోర విషాదం చోటుచేసుకుంది. అరారియా జిల్లా కవైయా గ్రామంలో ఒక పూరి గుడిసెకు నిప్పంటుకుని చెలరేగిన మంటల్లో చిక్కుకొని ఆరుగురు అభం శుభం తెలియని చిన్నారులు సజీవ దహనమయ్యారు. మొక్కజొన్న కంకులు కాలుస్తుండగా ప్రమాదవశాత్తు గుడిసెకు మంటలు అంటుకోవడంతో ఈ దారుణ ప్రమాదం జరిగింది. గుడిసెలో మంటలు వేగంగా వ్యాపించడంతో చిన్నారులు బయటకు రాలేక లోపలే చిక్కుకుపోయారు. గుడిసె కాలుతున్న మంటలు ఎగజిమ్మడం, లోపల చిన్నారుల హాహాకారాలను విన్న స్థానికులు అక్కడికి చేరుకొని మంటలను అదుపుచేసేందుకు ప్రయత్నించినా ఫలితం లేకపోయింది. అప్పటికే ఆ పసి ప్రాణాలు అగ్నికి ఆహుతయ్యాయి. ఈ ఘటనపై సమాచారం అందుకున్న పోలీసులు ఘటనా స్థలాన్ని పరిశీలించారు. చిన్నారుల మృతదేహాలను పోస్టుమార్టం నిమిత్తం ఆస్పత్రికి తరలించారు. మృతులంతా 3-6 ఏళ్ల లోపు చిన్నారులే కావడం అందరినీ కలిచివేస్తోంది. వారి కుటుంబాలకు తీర్చని వ్యథను మిగుల్చుతున్నది. చిన్నారుల మరణంతో వారి తల్లిదండ్రులు, కుటుంబసభ్యుల రోధనలు మిన్నంటాయి.