BIG NEWS: హర్యానాలో పాక్ గూఢచారుల గుట్టురట్టు.. యూట్యూబర్ సహా ఆరుగురి అరెస్ట్
హర్యానాలో గూఢచారుల గుట్టురట్టయింది. ట్రావెల్ విత్ జో అనే యూట్యూబ్ ఛానల్ నిర్వహిస్తున్న జ్యోతి మల్హోత్రా (Youtuber Jyothi Malhotra) అనే యూట్యూబర్, మరో ఆరుగురిని పోలీసులు అరెస్ట్ చేశారు.
దిశ, వెబ్డెస్క్: హర్యానాలో గూఢచారుల గుట్టురట్టయింది. ట్రావెల్ విత్ జో అనే యూట్యూబ్ ఛానల్ నిర్వహిస్తున్న జ్యోతి మల్హోత్రా (Youtuber Jyothi Malhotra) అనే యూట్యూబర్, మరో ఆరుగురిని పోలీసులు అరెస్ట్ చేశారు. ట్రావెల్ వీసా మీద పాకిస్తాన్ లో పర్యటించిన జ్యోతి.. భారత సైనిక సమాచారాన్ని పాక్ కు చేరవేసినట్లు గుర్తించారు. జ్యోతి మల్హోత్రా పాక్ ఐఎస్ఐ ఏజెంట్ గా పనిచేసినట్లు గుర్తించిన పోలీసులు వెంటనే ఆమెను వెతికి అరెస్ట్ చేశారు. సున్నితమైన సమాచారాన్ని లీక్ చేసేందుకు డిజిటల్ ప్లాట్ ఫారమ్స్ ను దుర్వినియోగం చేయడంపై ఈ అరెస్ట్ ఆందోళనలను రేకెత్తించింది.
ప్రయాణాలపై దృష్టి సారించిన యూట్యూబ్ ఛానెల్ను నిర్వహిస్తున్న మల్హోత్రా, పాకిస్తాన్తో రహస్య సైనిక సమాచారాన్ని పంచుకున్నారన్న ఆరోపణలు ఎదుర్కొంటున్నారు. పాకిస్తాన్ హై కమిషన్ అధికారి డానిష్ తో ఆమెకు సంబంధాలున్నాయని, ఆమె పాకిస్తాన్ కు వెళ్లినపుడు సమాచారాన్ని లీక్ చేసిందని ఉన్నత అధికారులు చెప్తున్నారు.
హిసార్ పోలీసు ప్రతినిధి వికాస్ కుమార్ మాట్లాడుతూ.. జ్యోతి మల్హోత్రాను అదుపులోకి తీసుకున్నామని, మరిన్ని వివరాలు సేకరించడానికి అధికారులు ఆమెను ప్రశ్నిస్తున్నారని తెలిపారు. సబ్-ఇన్స్పెక్టర్ సంజయ్ ఫిర్యాదు ఆధారంగా.. హిసార్ సివిల్ లైన్స్ పోలీస్ స్టేషన్లో ఎఫ్ఐఆర్ నమోదు చేయబడింది. ఎఫ్ఐఆర్ ప్రకారం బ్లాగర్ 2023లో ఢిల్లీలోని పాకిస్తాన్ హైకమిషన్ను సందర్శించింది. అక్కడ ఆమెకు న్యూఢిల్లీలోని పాకిస్తాన్ హైకమిషన్ (PHC) ఉద్యోగి ఎహ్సాన్-ఉర్-రహీం అలియాస్ డానిష్తో పరిచయం ఏర్పడింది.
"ఆ మహిళ తాను ఎహ్సాన్-ఉర్-రహీం అలియాస్ డానిష్తో టచ్లో ఉన్నానని, 2023లో పాకిస్తాన్ పర్యటన సందర్భంగా అలీ ఎహ్వాన్ను కలిశానని, అతను నా బస, ప్రయాణాన్ని చూసుకున్నాడని వెల్లడించింది. ఎహ్వాన్ ఆమెను పాకిస్తాన్ భద్రతా, నిఘా అధికారులకు పరిచయం చేసింది. అక్కడ ఆమె షకీర్, రాణా షాబాజ్లను కూడా కలిసింది" అని ఎఫ్ఐఆర్లో ఉంది. "ఎవరూ ఆమెను అనుమానించకుండా ఉండటానికి బ్లాగర్ షకీర్ పేరును 'జాట్ రంధావా' అని సేవ్ చేసాడు. 2023లో పాకిస్తాన్ నుండి తిరిగి వచ్చిన తర్వాత, ఆమె వాట్సాప్, టెలిగ్రామ్, స్నాప్చాట్ వంటి ఎన్క్రిప్టెడ్ ప్లాట్ఫామ్లలో సహచరులతో టచ్లో ఉంది" అని పోలీసు ఎఫ్ఐఆర్ పేర్కొంది.
గడిచిన రెండేళ్లలో మూడుసార్లు పాకిస్తాన్ ను సందర్శించిన జ్యోతి.. యూట్యూబ్ వీడియోల కోసం చైనా, బంగ్లాదేశ్, థాయిలాండ్, నేపాల్, భూటాన్, యూఏఈ దేశాలను సందర్శించింది. సోషల్ మీడియా హ్యాండిల్స్ ద్వారా పాకిస్తాన్ పరిస్థితుల్ని పర్యాటకులకు తెలిపే పనిని పాక్ ఇంటెలిజెన్స్ అధికారులు జ్యోతికి అప్పగించినట్లు సమాచారం.
