క్షయ వ్యాధి నివారణకు టీకా.. భారత్ బయోటెక్ కీలక ప్రకటన

దిశ, వెబ్‌డెస్క్: ప్రపంచవ్యాప్తంగా లక్షలాది మంది ప్రాణాలు బలిగొంటున్న క్షయవ్యాధి (Tuberculosis) నివారణకు భారత్ బయోటెక్ ఇంటర్నేషనల్ లిమిటెడ్ (BBIL) మరో ముందడుగు వేసింది. స్పెయిన్‌కు చెందిన బయోఫ్యాబ్రి (Biofabric) సంస్థతో ఒప్పందం కుదుర్చుకున్నట్లు తాజాగా భారత్ బయోటెక్ ప్రకటించింది. ఈ ఒప్పందం ద్వారా MTBVAC అనే కొత్త క్షయవ్యాధి టీకాను భారత్‌లో పూర్తి స్థాయిలో తయారు చేయనున్నారు. MTBVAC టీకా నవజన్మ శిశువులు, యుక్త వయస్కులు, పెద్దలకు (adults) రక్షణ కల్పించేలా రూపొందించారు. ప్రస్తుతం ఉన్న BCG టీకా కంటే ఎక్కువ సమర్థవంతంగా, ఎక్కువ కాలం రక్షణ ఇచ్చే అవకాశం ఉందని నిపుణులు అంచనా వేస్తున్నారు. ఈ టీకా మానవ మూలం నుంచి తీసుకున్న జీవించి బలహీనపరచబడిన మైకోబాక్టీరియం ట్యూబర్‌క్యులోసిస్ ఆధారంగా అభివృద్ధి చేశారు.

భారత్ బయోటెక్, బయోఫ్యాబ్రి మధ్య మూడేళ్లుగా సహకారం కొనసాగుతోంది. ఇప్పటికే భారత్‌లో ఫేజ్-1 మరియు ఫేజ్-2 క్లినికల్ ట్రయల్స్ విజయవంతంగా పూర్తయ్యాయి. టీకా సురక్షితమని, రోగనిరోధక శక్తిని పెంచుతుందని ఫలితాలు నిరూపించాయి. దీంతో, మూడో దశ (ఫేజ్-3) సమర్థత పరీక్షలకు సన్నాహాలు జరుగుతున్నాయి. 2026 ప్రారంభంలో ఈ పరీక్షలు ప్రారంభమవుతాయని భారత్ బయోటెక్ తెలిపింది. ఈ ఒప్పందం ప్రకారం, ఆఫ్రికా మరియు ఆగ్నేయాసియాలోని 70కి పైగా దేశాల్లో MTBVAC టీకా ఉత్పత్తి మరియు సరఫరాకు భారత్ బయోటెక్ బాధ్యత వహిస్తుంది. ఈ ప్రాంతాలు క్షయవ్యాధి బారిన ఎక్కువగా పడుతున్నవి. ప్రపంచ ఆరోగ్య సంస్థ (WHO) మార్గదర్శకాలకు అనుగుణంగా సమాన అవకాశాలతో టీకా అందుబాటులోకి తెచ్చేందుకు ఈ భాగస్వామ్యం కీలకమని భారత్ బయోటెక్ ఎగ్జిక్యూటివ్ చైర్మన్ డాక్టర్ కృష్ణ ఎల్లా (Krishna Ella) పేర్కొన్నారు.