వెస్ట్ బెంగాల్‌లో బీజేపీ మేనిఫెస్టో : ఓటర్లపై అమిత్ షా వరాల జల్లు

దిశ, వెబ్‌డెస్క్: పశ్చిమ బెంగాల్‌లో రెండు దశల్లో జరగనున్న అసెంబ్లీ ఎన్నికల కోసం భారతీయ జనతా పార్టీ (BJP) తన ఎన్నికల మేనిఫెస్టోను సంకల్ప పత్రం(Sankalpa Patram) పేరిట శుక్రవారం విడుదల చేసింది. కేంద్ర హోంమంత్రి అమిత్ షా కోల్‌కతాలో జరిగిన విలేకరుల సమావేశంలో దీనిని ఆవిష్కరిస్తూ.. రాష్ట్రంలో చొరబాటుదారులపై కఠిన చర్యలు, మెరుగైన శాంతిభద్రతలు, మహిళలకు ఆర్థిక సాయం, ఏడో వేతన సంఘం అమలు వంటి కీలక హామీలను ప్రకటించారు.

ఆరు నెలల్లో UCC.. 45 రోజుల్లో పే-కమిషన్

రాష్ట్రంలో బీజేపీ అధికారంలోకి వస్తే ఆరు నెలల్లోనే యూనిఫామ్ సివిల్ కోడ్(UCC)ని అమలు చేస్తామని అమిత్ షా స్పష్టం చేశారు. అలాగే.. ప్రభుత్వ ఉద్యోగుల కోసం ఏడో వేతన సంఘాన్ని కేవలం 45 రోజుల్లోనే పట్టాలెక్కిస్తామని హామీ ఇచ్చారు. ఈ మేనిఫెస్టో రైతులు, యువత, మహిళలకు కొత్త దిశానిర్దేశం చేస్తుందని, ప్రధాని మోదీ ఆకాంక్షించే వికసిత్ భారత్ రోడ్‌మ్యాప్‌ను బెంగాల్ ప్రజల ముందుకు తెస్తుందని ఆయన పేర్కొన్నారు.

'సంకల్ప పత్రం'లోని ప్రధాన అంశాలు

మహిళా సాధికారత: మహిళలకు నెలకు రూ.3,000 ఆర్థిక సాయం. అలాగే రాష్ట్ర పోలీసు విభాగంతో సహా అన్ని ప్రభుత్వ ఉద్యోగాల్లో మహిళలకు 33 శాతం కోటా.

యువతకు ఊరట: నిరుద్యోగ యువతకు నెలకు రూ.3,000 నిరుద్యోగ భృతి.

చొరబాటుదారులపై ఉక్కుపాదం: అక్రమ చొరబాటుదారుల విషయంలో జీరో టాలరెన్స్ విధానం అమలు. సరిహద్దులను సురక్షితం చేయడం.

కేంద్ర పథకాల అమలు: ఆయుష్మాన్ భారత్ వంటి కేంద్ర పథకాలను పశ్చిమ బెంగాల్‌లో తక్షణమే అమలు చేయడం.

సాంస్కృతిక వారసత్వం: బెంగాల్ గొప్ప సంస్కృతిని చాటిచెప్పేలా 'వందేమాతరం మ్యూజియం' నిర్మాణం.

మమతా బెనర్జీ ప్రభుత్వంపై విమర్శలు

ఈ సందర్భంగా ముఖ్యమంత్రి మమతా బెనర్జీపై అమిత్ షా తీవ్రస్థాయిలో విమర్శలు గుప్పించారు. గత 15 ఏళ్లలో బెంగాల్ తీవ్ర నిరాశకు గురైందని, దీనిపై తాము ఛార్జ్ షీట్ సిద్ధం చేశామని చెప్పారు. చొరబాటుదారులతో కుమ్మక్కు కావడం, తప్పుడు వాగ్దానాల వల్లే మమతా బెనర్జీ మూడుసార్లు అధికారాన్ని చేజిక్కించుకున్నారని ఆరోపించారు. గతంలో కమ్యూనిస్టు పాలన వదిలించుకోవడానికి ప్రజలు మమతను ఎన్నుకున్నారని, కానీ ఇప్పుడు ఆమె హయాంలో సిండికేట్లు, గుండారాజ్, చొరబాటుదారులు పెరిగిపోయారని మండిపడ్డారు.

'సోనార్ బంగ్లా' దిశగా అడుగులు

వికసిత్, సోనార్ (బంగారు) పశ్చిమ బెంగాల్‌ను నిర్మించడానికి ఈ సంకల్ప పత్రం ఒక మార్గదర్శి అమిత్ షా తెలిపారు. రాష్ట్ర ప్రజలు మనస్ఫూర్తిగా మార్పు కోరుకుంటున్నారని, బీజేపీకి పట్టం కడతారనే నమ్మకం తనకు ఉందని ఆయన ధీమా వ్యక్తం చేశారు. పశ్చిమ బెంగాల్‌లో ఏప్రిల్ 23, 29 తేదీల్లో రెండు దశల్లో పోలింగ్ జరగనుంది. మే 4వ తేదీన ఓట్ల లెక్కింపు చేపట్టి ఫలితాలను ప్రకటిస్తారు.