అమెరికాతో వాణిజ్య ఒప్పందం తిరస్కరణ.. ఆ వార్తలు అవాస్తవం: కేంద్ర మంత్రి పీయూష్ గోయల్

దిశ, డైనమిక్ బ్యూరో: అమెరికాతో భారత్ జరపాల్సిన వాణిజ్య ఒప్పందం నిలిచిపోయిందంటూ వస్తున్న వార్తలను కేంద్ర వాణిజ్య, పరిశ్రమల శాఖ మంత్రి పీయూష్ గోయల్ తీవ్రంగా ఖండించారు. ఆ వార్తల్లో ఎలాంటి నిజం లేదని, అవన్నీ పూర్తి అవాస్తవం, నిరాధారమైనవని ఆయన స్పష్టం చేశారు. ఇటీవల భారత్ పర్యటనకు వచ్చిన అమెరికా వాణిజ్య ప్రతినిధి (USTR) జేమీసన్ గ్రీర్‌తో జరిగిన చర్చలు అత్యంత అద్భుతంగా సాగాయని ఆయన సామాజిక మాధ్యమం ‘X’ (ట్విట్టర్) ద్వారా వెల్లడించారు. ఇరు దేశాల వ్యాపారులు, రైతులు, కార్మికులు, వినియోగదారులకు ప్రయోజనం చేకూరేలా ఒక సమతుల్యమైన, వాణిజ్యపరమైన ఒప్పందాన్ని కుదుర్చుకోవడానికి రెండు దేశాలు కట్టుబడి ఉన్నాయని ఆయన పునరుద్ఘాటించారు. ఈ దిశగా ఇరు దేశాల వాణిజ్య బృందాలు నిరంతరం శ్రమిస్తున్నాయని గోయల్ తెలిపారు.

వాణిజ్య ఒప్పందాన్ని తిరస్కరించింది

అయితే, భారత్ తన డిమాండ్లపై అమెరికా నుంచి స్పష్టమైన హామీ లభించకపోవడంతో ఈ వేగవంతమైన వాణిజ్య ఒప్పందాన్ని తిరస్కరించిందని, చర్చల్లో ప్రతిస్తంభన ఏర్పడిందని అంతర్జాతీయ వార్తా సంస్థ ‘రాయిటర్స్’ ఒక కథనాన్ని ప్రచురించింది. దీనిపై కేంద్ర మంత్రి గోయల్ పైవిధంగా స్పందించారు.

ఒప్పందం సిద్ధంగా ఉంది: రాజేష్ అగర్వాల్

మరోవైపు, భారత్-అమెరికా వాణిజ్య ఒప్పంద చర్చల్లో ఎలాంటి అడ్డంకులు లేవని కేంద్ర వాణిజ్య శాఖ కార్యదర్శి రాజేష్ అగర్వాల్ స్పష్టం చేశారు. జూన్ నెల వాణిజ్య గణాంకాల విడుదల సందర్భంగా ఆయన మాట్లాడుతూ.. ‘భారత్-అమెరికా ఫ్రేమ్‌వర్క్ ఒప్పందం పూర్తిగా సిద్ధంగా ఉంది. దీనిపై సంతకాలు చేయడానికి మేము సిద్ధంగా ఉన్నాం, సరైన సమయం కోసం వేచి చూస్తున్నాం’ అని తెలిపారు. మే నెలలో భారత బృందం అమెరికాలో, జూన్ నెలలో అమెరికా బృందం భారత్‌లో పర్యటించాయని, చర్చలు సరైన మార్గంలోనే సాగుతున్నాయని ఆయన వివరించారు.

అమెరికా విదేశాంగ శాఖ

ఈ ఒప్పందంపై అమెరికా అధికారులు కూడా సానుకూలంగా ఉన్నట్లు అమెరికా విదేశాంగ శాఖ ప్రతినిధి మార్గరెట్ మాక్‌లియోడ్ తెలిపారు. భారత్‌తో తాత్కాలిక వాణిజ్య ఒప్పందం త్వరలోనే కుదురుతుందనే ఆశాభావాన్ని అమెరికా అధికారులు వ్యక్తం చేస్తున్నట్లు ఆమె పేర్కొన్నారు.