సిడ్నీ ఉగ్ర కాల్పుల విచారణలో సంచలనం.. హైదరాబాద్ లో వీసా పొందిన ఉగ్రవాది

దిశ, వెబ్ డెస్క్: ఆస్ట్రేలియాలోని సిడ్నీ నగరం లో ఇటీవల జరిగిన ఉగ్రవాద కాల్పుల ఘటన ఆ దేశవ్యాప్తంగా తీవ్ర భయాందోళనలు సృష్టించింది. ఈ భయంకర దాడిలో దాదాపు 10 మందికి పైగా అమాయక ప్రజలు గాయపడ్డారు. ఈ దాడి అనంతరం అధికారులు జరిపిన దర్యాప్తులో షాకింగ్ విషయాలు బయటపడ్డాయి. ఆ ఉగ్రవాదిని సాజిద్ అక్రమ్ గా గుర్తించారు. అత్యంత కీలకమైన విషయం ఏమిటంటే, నిందితుడు సాజిద్ అక్రమ్ వద్ద ఇండియన్ పాస్‌పోర్ట్ లభ్యం కావడం. ఆ పాస్‌పోర్ట్‌ను హైదరాబాద్‌లో పొందినట్లుగా నిఘా వర్గాలు గుర్తించాయి. ఈ పరిణామంతో భారత భద్రతా సంస్థలు కూడా అప్రమత్తమయ్యాయి. ఉగ్రవాది సాజిద్‌కు హైదరాబాద్‌తో ఉన్న సంబంధాలు, అతడి కదలికలపై నిఘా వర్గాలు లోతుగా దర్యాప్తు చేస్తున్నాయి.

హైదరాబాద్‌ నుంచి ఫిలిప్పిన్స్‌, పాక్‌ ప్రయాణంపై అనుమానం

భారతీయ పాస్‌పోర్ట్ లభ్యం కావడంతో, సాజిద్ అక్రమ్ ట్రావెల్ హిస్టరీపై అధికారులు దృష్టి సారించారు. నిఘా వర్గాల ప్రాథమిక అనుమానం ప్రకారం, ఉగ్రవాది సాజిద్ హైదరాబాద్ నుంచి ఫిలిప్పిన్స్, పాకిస్తాన్ వంటి దేశాలకు ప్రయాణించి ఉండవచ్చు. సిడ్నీలో జరిగిన ఈ ఉగ్రదాడి వెనుక అంతర్జాతీయ ఉగ్రవాద సంస్థల పాత్ర ఉందా అనే కోణంలో దర్యాప్తు జరుగుతోంది. ముఖ్యంగా, భారత్ వేదికగా పాస్‌పోర్ట్ పొందిన వ్యక్తి ఆస్ట్రేలియాలో ఉగ్రదాడికి పాల్పడటం భారత భద్రతా సంస్థలకు పెద్ద సవాలుగా మారింది. సాజిద్‌ అక్రమ్‌కు ఉన్న ఉగ్రవాద సంబంధాలు, అతని నెట్‌వర్క్ గురించిన పూర్తి వివరాలు సేకరించేందుకు ఆస్ట్రేలియా నిఘా ఏజెన్సీలతో భారత అధికారులు సంయుక్తంగా దర్యాప్తును ముమ్మరం చేశారు.