రూ. 8,000 విలువైన కూపన్‌: వాషింగ్ మెషీన్, టీవీ, గ్రైండర్, ఫ్రిజ్, మిక్సీ ఏదైనా ఫ్రీ!

దిశ, వెబ్‌డెస్క్: తమిళనాడు ముఖ్యమంత్రి, డీఎంకే అధినేత ఎంకే స్టాలిన్ ఆదివారం (మార్చి 29, 2026) తమ పార్టీ ఎన్నికల మేనిఫెస్టోను విడుదల చేశారు. గతంలో మేనిఫెస్టోను 'హీరో'గా అభివర్ణించిన ఆయన, ఈసారి దీన్ని 'సూపర్‌స్టార్' మేనిఫెస్టోగా పేర్కొన్నారు. గృహిణులు, విద్యార్థులు, రైతులను ఆకట్టుకునేలా ఇందులో భారీ హామీలను గుప్పించారు.

మేనిఫెస్టోలోని ముఖ్యాంశాలు..

ఇల్లత్తరసి పథకం (గృహిణుల కోసం): ఆదాయపు పన్ను చెల్లించని గృహిణులందరికీ రూ. 8,000 విలువైన కూపన్‌ను అందజేస్తారు. ఈ కూపన్ ద్వారా వాషింగ్ మెషీన్, టీవీ, గ్రైండర్, ఫ్రిజ్, మిక్సీ, మైక్రోవేవ్ ఓవెన్ లేదా ఇండక్షన్ స్టవ్ వంటి గృహోపకరణాలను కొనుగోలు చేయవచ్చు లేదా మార్చుకోవచ్చు.

మహిళా ఆర్థిక సహాయం పెంపు: ప్రస్తుతం మహిళా కుటుంబ యజమానులకు ఇస్తున్న 'కళైజ్ఞర్ మగలిర్ ఉరిమై తొగై' (నెలవారీ గౌరవ వేతనం)ను రూ. 1,000 నుండి రూ. 2,000కు పెంచుతున్నట్లు ప్రకటించారు.

ఉచిత అల్పాహార పథకం విస్తరణ: ప్రస్తుతం 1 నుండి 5వ తరగతి వరకు ఉన్న ముఖ్యమంత్రి అల్పాహార పథకాన్ని, ఇకపై 8వ తరగతి వరకు ఉన్న విద్యార్థులందరికీ వర్తింపజేస్తారు.

పెన్షన్ల పెంపు: వృద్ధాప్య పింఛనును రూ. 1,200 నుండి రూ. 2,000కు, దివ్యాంగుల పింఛనును రూ. 2,500కు పెంచుతామని హామీ ఇచ్చారు.

ఆరోగ్య బీమా: ముఖ్యమంత్రి ఇన్సూరెన్స్ పథకం కింద వార్షిక ఆదాయ పరిమితిని రూ. 5 లక్షలకు పెంచుతూ, బీమా మొత్తాన్ని రూ. 10 లక్షల వరకు పెంచారు.

రైతుల కోసం: ఉచిత విద్యుత్ పొందుతున్న రైతులందరికీ ఉచితంగా విద్యుత్ మీటర్లను ఏర్పాటు చేస్తామని వెల్లడించారు.

నిధులపై క్లారిటీ: ఈ పథకాల అమలుకు నిధులు ఎక్కడి నుండి వస్తాయన్న ప్రశ్నకు స్టాలిన్ బదులిస్తూ.. 2021 ఎన్నికల సమయంలో కూడా ఇలాంటి సందేహాలే వ్యక్తమయ్యాయని, కానీ తమ ప్రభుత్వం అన్ని హామీలను నెరవేర్చిందని గుర్తుచేశారు. గృహిణులకు నేరుగా నగదు ఇస్తే ఖర్చయిపోయే అవకాశం ఉందని, అందుకే వస్తువుల కొనుగోలు కోసం కూపన్ల పద్ధతిని ప్రవేశపెట్టినట్లు ఆయన వివరించారు. తమిళనాడు రాజకీయాల్లో డీఎంకే విడుదల చేసిన ఈ మేనిఫెస్టో ఇప్పుడు హాట్ టాపిక్‌గా మారింది. ముఖ్యంగా 'ఇల్లత్తరసి' పథకం మహిళా ఓటర్లను ఏ మేరకు ప్రభావితం చేస్తుందో చూడాలి.