స్లీవ్లెస్ డ్రెస్ వివాదం : ఢిల్లీ యూనివర్సిటీ విద్యార్థిని తీవ్ర ఆరోపణలు.. అబద్ధమంటున్న ప్రత్యక్ష సాక్షులు!
ఢిల్లీ యూనివర్సిటీలో జరిగిన ఒక మహిళా సాధికారత కార్యక్రమంలో ‘స్లీవ్లెస్’ డ్రెస్ ధరించినందుకు తనను వేదికపైకి అనుమతించలేదని ఓ విద్యార్థిని చేసిన ఆరోపణలు తీవ్ర దుమారం రేపుతున్నాయి.
దిశ, డైనమిక్ బ్యూరో: ఢిల్లీ యూనివర్సిటీలో జరిగిన ఒక మహిళా సాధికారత కార్యక్రమంలో ‘స్లీవ్లెస్’ డ్రెస్ ధరించినందుకు తనను వేదికపైకి అనుమతించలేదని ఓ విద్యార్థిని చేసిన ఆరోపణలు తీవ్ర దుమారం రేపుతున్నాయి. అయితే, ఆమె ఆరోపణల్లో ఎలాంటి వాస్తవం లేదని అక్కడే ఉన్న ఇతర విద్యార్థులు ఖండిస్తున్నారు.
విద్యార్థిని ఆరోపణలు ఇవే..
ఏప్రిల్ 12న శ్రీరామ్ కాలేజ్ ఆఫ్ కామర్స్లో ‘నారీ శక్తి’ థీమ్తో జరిగిన మాక్ పార్లమెంట్ ఈవెంట్లో దౌలత్రామ్ కాలేజీకి చెందిన సారా శర్మ అనే విద్యార్థిని పాల్గొంది. కేంద్ర మంత్రి మన్సుఖ్ మాండవీయ ముఖ్య అతిథిగా హాజరైన ఈ సభలో, జడ్జీలను సన్మానించే అవకాశం తనకు దక్కిందని.. కానీ, తాను స్లీవ్లెస్ దుస్తులు ధరించిన కారణంగా మంత్రిత్వ శాఖ అధికారులు తనను అడ్డుకుని బహిరంగంగా అవమానించారని ఆమె ఆరోపిస్తూ ఓ వీడియోను విడుదల చేసింది.
తోటి విద్యార్థుల వాదన..
ఈ వీడియో నెట్టింట వైరల్ కావడంతో, అక్కడే ఉన్న విభ ఛబ్రా, దిశా గోయల్ అనే ఇతర విద్యార్థినులు ప్రత్యక్ష సాక్షులుగా చెబుతున్నారు. సారా శర్మకు అప్పటికే వేదికపై ప్రసంగించడంతో పాటు ఇతర కీలక బాధ్యతలు ఉన్నాయని, వేరొక విద్యార్థిని కోరిక మేరకు చర్చించిన తర్వాతే సన్మాన కార్యక్రమం నుంచి సారా శర్మ స్వచ్ఛందంగా తప్పుకుందని వారు స్పష్టం చేశారు. అక్కడ ఆమె దుస్తులపై ఎవరూ అభ్యంతరం వ్యక్తం చేయలేదని, అలాంటి దుస్తులే వేసుకున్న ఇతరులను ఎవరినీ నిర్వాహకులు ఆపలేదని తెలిపారు. సోషల్ మీడియాలో కేవలం పాపులారిటీ కోసమే (saarahxsharma ఇన్స్టాగ్రామ్లో ఆమెకు 1382 మంది ఫాలోవర్లు ఉన్నారు) ఆమె ఇలాంటి అబద్ధపు ఆరోపణలు చేస్తోందని వారు విమర్శించారు.
