పెరిగిన ఖర్చులు, తగ్గిన డిమాండ్.. విదేశీ రూట్లకు ‘ఇండిగో’ తాత్కాలిక బ్రేక్
దిశ, వెబ్డెస్క్: దేశంలోనే అతిపెద్ద బడ్జెట్ ఎయిర్లైన్స్ ఇండిగో (IndiGo) అత్యంత కీలక నిర్ణయం తీసుకుంది. హాంకాంగ్, షాంఘై, వియత్నాం సహా పలు ప్రధాన విదేశీ నగరాలకు తమ విమాన సర్వీసులను తాత్కాలికంగా నిలిపివేస్తున్నట్లుగా ప్రకటించింది. అయితే ఈ నిర్ణయం వెనుక కేవలం విమానాల కొరత మాత్రమే కాకుండా, అంతర్జాతీయ మార్కెట్లో మారిన ఆర్థిక సమీకరణాలు కూడా ప్రధాన కారణమని తెలుస్తోంది. ఇటీవల కాలంలో హాంకాంగ్, చైనాలోని షాంఘై, వియత్నాంలోని హో చి మిన్ సిటీ వంటి రూట్లలో ప్రయాణికుల రద్దీ ఆశించిన స్థాయిలో లేదు. డిమాండ్ లేకపోవడంతో విమానాలను ఖాళీగా, తక్కువ మందితో నడపాల్సి వస్తోంది. ఇది సంస్థపై అదనపు ఆర్థిక భారం పడేలా చేస్తోంది.
పెరిగిన విమాన నిర్వహణ వ్యయం..
ప్రస్తుతం అంతర్జాతీయ విమానయాన రంగం తీవ్రమైన ఖర్చుల సవాలును ఎదుర్కొంటోంది. విమాన ఇంధన (ATF) ధరల హెచ్చుతగ్గులు, విమానాల విడిభాగాల కొరత, అంతర్జాతీయ రూట్లలో పెరిగిన నిర్వహణ వ్యయం వంటి కారణాల వల్ల బడ్జెట్ క్యారియర్ అయిన ఇండిగోకు ఈ రూట్లను నిర్వహించడం భారంగా మారింది. అంతర్జాతీయ రూట్లలో నష్టాలను చవిచూడటం కంటే, అందుబాటులో ఉన్న విమాన వనరులను అధిక లాభదాయకత, రద్దీ ఉన్న దేశీయ మార్గాలకు మళ్లించడమే ఉత్తమమని ఇండిగో వ్యూహాత్మకంగా అడుగులు వేసింది.
