తమిళనాడు, బెంగాల్‌లలో పోలింగ్ ప్రారంభం.. పోటెత్తిన ఓటర్లు!

దిశ, వెబ్ డెస్క్: దేశవ్యాప్తంగా ఎంతో ఆసక్తి కలిగిస్తున్న తమిళనాడు, పశ్చిమ బెంగాల్ అసెంబ్లీ ఎన్నికల పోలింగ్ ఉదయం 7 గంటలకు ప్రారంభమైంది. తమిళనాడులో మొత్తం 234 నియోజకవర్గాలకు ఒకే విడతలో పోలింగ్ జరుగుతుంది. నేడు సుమారు 5.73 కోట్ల మంది ఓటర్లు తమ ఓటు హక్కును వినియోగించుకోనున్నారు. డీఎంకే (DMK), ఏఐఏడీఎంకే (AIADMK) మధ్య ప్రధాన పోటీ ఉండగా, నటుడు విజయ్ నేతృత్వంలోని 'తమిళగ వెట్రి కళగం' (TVK) ఈసారి ఎన్నికల్లో కొత్త సమీకరణాలకు తెరలేపింది. ఉదయం నుండే ప్రముఖులు, సామాన్యులు భారీ సంఖ్యలో పోలింగ్ కేంద్రాలకు చేరుకుని ఓటు హక్కు వినియోగించుకుంటున్నారు.

మరోవైపు పశ్చిమ బెంగాల్‌లో మొదటి విడత పోలింగ్ ప్రక్రియ మొదలైంది. తొలి దశలో భాగంగా 16 జిల్లాల్లోని 152 అసెంబ్లీ స్థానాలకు ఓటింగ్ జరుగుతోంది. ముఖ్యమంత్రి మమతా బెనర్జీ నేతృత్వంలోని తృణమూల్ కాంగ్రెస్ (TMC) వరుసగా నాలుగోసారి అధికారం చేపట్టాలని చూస్తుండగా, బీజేపీ (BJP) గట్టి పోటీనిస్తోంది. సమస్యాత్మక ప్రాంతాల్లో ఎటువంటి అవాంఛనీయ ఘటనలు జరగకుండా ఎన్నికల సంఘం భారీగా కేంద్ర బలగాలను మోహరించింది. ఈ రెండు రాష్ట్రాలతో పాటు మిగిలిన అసెంబ్లీ ఎన్నికల ఫలితాలు మే 4న వెలువడనున్నాయి.

నేడే తమిళనాడు ఎన్నికలు.. సర్వం సిద్ధం