మోడీ-ట్రంప్ సీరియస్ డిస్కషన్.. 40 నిమిషాల చర్చల్లో తేలిందేమిటి?

దిశ, వెబ్‌డెస్క్: పశ్చిమాసియాలో ముదురుతున్న ఉద్రిక్తతల నేపథ్యంలో భారత ప్రధాని నరేంద్ర మోడీ, అమెరికా అధ్యక్షుడు డొనాల్డ్ ట్రంప్ మధ్య జరిగిన ఫోన్ సంభాషణ ప్రపంచవ్యాప్తంగా ప్రాధాన్యత సంతరించుకుంది. దాదాపు 40 నిమిషాల పాటు సాగిన ఈ సుదీర్ఘ సంభాషణలో ఇరు దేశాల మధ్య ద్వైపాక్షిక సంబంధాలతో పాటు అంతర్జాతీయ భద్రతా అంశాలు చర్చకు వచ్చినట్లు సమాచారం. ముఖ్యంగా అమెరికా-ఇరాన్‌ మధ్య శాంతి చర్చలు విఫలం కావడం, పశ్చిమాసియాలో యుద్ధ మేఘాలు కమ్ముకుంటున్న తరుణంలో వీరిద్దరూ చర్చించుకోవడం అత్యంత కీలకంగా మారింది. ఇక్కడ నెలకొన్న ఉద్రిక్త పరిస్థితుల వల్ల ప్రపంచ ఆర్థిక వ్యవస్థపై, ముఖ్యంగా ముడి చమురు సరఫరాపై పడే ప్రభావం గురించి చర్చించినట్లు తెలుస్తోంది. యుద్ధ వాతావరణాన్ని తగ్గించి, దౌత్య మార్గాల్లో సమస్యల పరిష్కారానికి ఉన్న అవకాశాలపై దృష్టి సారించారు. పశ్చిమాసియాలో శాంతిని నెలకొల్పడంలో భారత్ పోషించాల్సిన నిర్మాణాత్మక పాత్ర గురించి చర్చించినట్లు సమాచారం. ఇరు దేశాల మధ్య రక్షణ మరియు వ్యూహాత్మక భాగస్వామ్యాన్ని మరింత బలోపేతం చేసుకోవాలని నిర్ణయించారు. అగ్రరాజ్యం అమెరికాకు, అగ్రగామి దేశంగా ఎదుగుతున్న భారత్‌కు మధ్య జరిగిన ఈ చర్చలు రాబోయే రోజుల్లో అంతర్జాతీయ రాజకీయాల్లో ఎటువంటి మార్పులు తీసుకువస్తాయో చూడాలి.