భారీ భూకంపం: భయంతో వీధుల్లోకి పరుగులు తీసిన ప్రజలు!

దిశ, వెబ్‌డెస్క్: ఫిలిప్పీన్స్‌లో సోమవారం మధ్యాహ్నం భారీ భూకంపం సంభవించింది. దేశంలోని మధ్య ప్రాంతంలో ఉన్న సెబూ (Cebu) ప్రావిన్స్‌లో భూమి కంపించడంతో ప్రజలు తీవ్ర భయాందోళనకు గురయ్యారు. రిక్టర్ స్కేలుపై ఈ భూకంప తీవ్రత 5.4గా నమోదైనట్లు అధికారులు వెల్లడించారు. ఫిలిప్పీన్స్ ఇన్‌స్టిట్యూట్ ఆఫ్ వోల్కనాలజీ అండ్ సీస్మాలజీ (PHIVOLCS - ఫివోల్క్స్) నివేదిక ప్రకారం.. ఈ భూకంపం మధ్యాహ్నం సుమారు 3:22 గంటలకు (స్థానిక కాలమానం ప్రకారం) సంభవించింది. భూకంప కేంద్రం సెబూ ప్రావిన్స్‌లోని బోగో సిటీ (Bogo City) కి ఆగ్నేయంగా 17 కిలోమీటర్ల దూరంలో, భూమికి 10 కిలోమీటర్ల లోతులో ఉన్నట్లు గుర్తించారు.

వణికిపోయిన జనం.. వీధుల్లోకి పరుగులు..

భూమి ఒక్కసారిగా కంపించడంతో కార్యాలయాలు, పాఠశాలలు, ఇళ్లలోని ప్రజలు ప్రాణభయంతో బయటకు పరుగులు తీశారు. ముఖ్యంగా సెబూ సిటీతో పాటు పరిసర ప్రాంతాల్లోని బహుళ అంతస్తుల భవనాలు ఊగిపోవడంతో జనం తీవ్ర ఆందోళన చెందారు. దాదాపు నిమిషం పాటు భూ ప్రకంపనలు కొనసాగినట్లు స్థానికులు తెలిపారు. ఈ భూకంపం కారణంగా ఇప్పటి వరకు ఎలాంటి ప్రాణ నష్టం సంభవించలేదని ప్రాథమిక సమాచారం అందుతోంది. అయితే, కొన్ని పాత భవనాలకు పగుళ్లు వచ్చే అవకాశం ఉందని అధికారులు భావిస్తున్నారు. ఈ భూకంపం వల్ల సునామీ ముప్పు లేదని స్పష్టం చేసినప్పటికీ, ఆఫ్టర్ షాక్స్ (తదుపరి ప్రకంపనలు) వచ్చే అవకాశం ఉన్నందున ప్రజలు అప్రమత్తంగా ఉండాలని ‘ఫివోల్క్స్’ హెచ్చరించింది. ప్రస్తుతం స్థానిక విపత్తు నిర్వహణ బృందాలు క్షేత్రస్థాయిలో ఆస్తి నష్టాన్ని అంచనా వేస్తున్నాయి.