ముఖ్యమంత్రి, మాజీ ఆర్థిక మంత్రికి ఈడీ షాక్

దిశ, వెబ్ డెస్క్: ముఖ్యమంత్రి పినరయి విజయన్, మాజీ ఆర్థిక మంత్రి టి.ఎం. థామస్ ఐజాక్ లకు ఈడీ బిగ్ షాక్ ఇచ్చింది. విదేశీ మారక ద్రవ్య నిర్వహణ చట్టం (FEMA) కింద సీఎం కార్యదర్శి అబ్రహం తో సహా ఇతర అధికారులకు షోకాజ్ నోటీసులను జారీ చేసింది. కేరళ ఇన్‌ఫ్రాస్ట్రక్చర్ ఇన్వెస్ట్‌మెంట్ ఫండ్ బోర్డ్ (KIIFB) మసాలా బాండ్‌ల జారీకి సంబంధించిన కేసులో ఈ నోటీసులు జారీ అయ్యాయి. KIIFB అనేది కేరళ రాష్ట్రంలో మౌలిక సదుపాయాల ప్రాజెక్టుల కోసం నిధులు సేకరించే ప్రభుత్వ సంస్థ. విదేశీ మారక ద్రవ్య నిబంధనలను ఉల్లంఘిస్తూ, మసాలా బాండ్‌ల ద్వారా నిధులను సేకరించడంలో FEMA నిబంధనలు పాటించలేదని ఈడీ ఆరోపిస్తోంది. ఈ షోకాజ్ నోటీసులు KIIFB యొక్క నిధుల సేకరణ విధానంపై తీవ్ర అనుమానాలను రేకెత్తిస్తున్నాయి.

ముఖ్యంగా, మాజీ ఆర్థిక మంత్రి అయిన థామస్ ఐజాక్‌పై ఈ ఆరోపణలు అధికంగా ఉన్నాయి. ఎందుకంటే ఆయన హయాంలోనే 2018-19లో KIIFB లండన్ స్టాక్ ఎక్స్ఛేంజ్‌లో ఈ మసాలా బాండ్‌లను జారీ చేసింది. ఈ లావాదేవీల ద్వారా సేకరించిన నిధులను రాష్ట్ర ప్రభుత్వం మౌలిక సదుపాయాల అభివృద్ధికి ఉపయోగించింది. అయితే, ఈ నిధుల సేకరణలో FEMA నిబంధనలకు విరుద్ధంగా వ్యవహరించడం సేకరించిన నిధులను సక్రమంగా నిర్వహించకపోవడం వంటి అంశాలపై ఈడీ ప్రధానంగా దృష్టి సారించింది. ఈ నోటీసులపై ఆయా వ్యక్తుల నుండి త్వరలో స్పందన వచ్చే అవకాశం ఉంది. అయితే సీఎంకే ఈడీ ₹466 కోట్ల వ్యవహారంలో నోటీసులు జారీ చేయడం ప్రస్తుతం దేశ వ్యాప్తంగా తీవ్ర చర్చనీయాంశం అయింది.