గగన్యాన్ సైంటిస్టుల వీఆర్ఎస్, రాజీనామాలకు కేంద్రం నో
గగన్యాన్, ఇతర కీలక ప్రాజెక్టుల శాస్త్రవేత్తల రాజీనామాలు, వీఆర్ఎస్ దరఖాస్తులను సాధారణ పద్ధతిలో ఆమోదించవద్దని కేంద్రం నిర్ణయం!
దిశ, వెబ్ డెస్క్: భారతదేశంలోని అంతరిక్ష పరిశోధనల్లో అత్యంత ప్రతిష్టాత్మకంగా చేపట్టిన 'గగన్యాన్' (Gaganyaan) వంటి కీలక మిషన్ల విషయంలో కేంద్ర ప్రభుత్వం కీలక నిర్ణయం తీసుకుంది. ఈ మిషన్కు ఎటువంటి ఆటంకాలు కలగకుండా ఉండేందుకు గగన్యాన్తో పాటు ఇస్రో (ISRO)కు చెందిన ఇతర ప్రధాన అంతరిక్ష ప్రాజెక్టులలో పనిచేస్తున్న శాస్త్రవేత్తలు, సాంకేతిక సిబ్బంది (Scientific & Technical personnel) సమర్పించే స్వచ్ఛంద పదవీ విరమణ (VRS), రాజీనామా (Resignation) దరఖాస్తులను ఇకపై సాధారణ పద్ధతిలో ఆమోదించబోమని కేంద్ర ప్రభుత్వం స్పష్టం చేసింది.
మిషన్లు సజావుగా సాగేందుకు నిబంధనలు కఠినతరం..
దేశ భద్రత, వ్యూహాత్మక ప్రయోజనాలు, అంతరిక్ష పరిశోధనల కాలపరిమితిని దృష్టిలో ఉంచుకుని ఈ నిర్ణయం తీసుకున్నట్లు కేంద్ర ప్రభుత్వ వర్గాలు తెలిపాయి. అనుభవజ్ఞులైన శాస్త్రవేత్తలు ప్రాజెక్టుల మధ్యలో తప్పుకోవడం వల్ల మిషన్ల పురోగతి మందగించే ప్రమాదం ఉందని ప్రభుత్వం భావిస్తోంది. అత్యంత అసాధారణమైన లేదా అనివార్యమైన పరిస్థితుల్లో మినహా, సాధారణ కారణాలతో ఇచ్చే రాజీనామాలను తిరస్కరించాలని సంబంధిత విభాగాలకు ఆదేశాలు జారీ చేసింది. రాబోయే కాలంలో ప్రయోగించనున్న మానవసహిత అంతరిక్ష యాత్ర (Gaganyaan)ను పూర్తి విజయవంతం చేయడంపైనే ప్రభుత్వం ప్రస్తుతం దృష్టి సారించింది.
