శ్రీలంక వైపు దూసుకొస్తున్న మరో ఇరాన్ యుద్ధనౌక.. లోపల వందలమంది సైనికులు!

దిశ, వెబ్‌డెస్క్: హిందూ మహాసముద్రం ప్రస్తుతం అంతర్జాతీయ యుద్ధ క్షేత్రంగా మారుతోంది. అమెరికా జలాంతర్గామి దాడిలో ఇరాన్ యుద్ధనౌక 'IRIS దేనా' ధ్వంసమై, 87 మంది నావికులు ప్రాణాలు కోల్పోయిన మరుసటి రోజే, మరో ఇరాన్ యుద్ధనౌక శ్రీలంక జలాల వైపు దూసుకురావడం తీవ్ర కలకలం రేపుతోంది. సుమారు 100 మందికి పైగా సిబ్బందితో ఉన్న ఈ రెండో యుద్ధనౌక, తమకు అత్యవసరంగా ఓడరేవులో చోటు కల్పించాలని (Port Call) శ్రీలంక ప్రభుత్వాన్ని కోరింది. నిన్నటి దాడి తరహాలోనే ఈ నౌకపై కూడా దాడి జరిగే అవకాశం ఉందన్న భయాందోళనలు వ్యక్తమవుతున్నాయి. "మా ప్రాధాన్యత ప్రాణాలను కాపాడటమే" అని శ్రీలంక మంత్రి నలింద జయతిస్స పేర్కొన్నారు. ప్రస్తుతం ఈ నౌక శ్రీలంక ప్రాంతీయ జలాలకు కొద్ది దూరంలో నిలిచి ఉంది.

అమెరికాపై ఇరాన్ నిప్పులు.. "తీవ్ర పరిణామాలు తప్పవు"

అంతర్జాతీయ జలాల్లో తమ నౌకపై దాడి చేయడంపై ఇరాన్ తీవ్రంగా స్పందించింది. విశాఖపట్నంలో జరిగిన మిలిటరీ వ్యాయామం ముగించుకుని తిరిగి వెళ్తుండగా, ఎలాంటి హెచ్చరికలు లేకుండా అమెరికా టార్పెడోలతో దాడి చేసిందని ఇరాన్ ఆరోపించింది. "అమెరికా సముద్రంపై అమానవీయ చర్యకు పాల్పడింది. దీనికి ఆ దేశం తగిన మూల్యం చెల్లించుకోక తప్పదు," అని ఇరాన్ మంత్రి 'X' వేదికగా హెచ్చరించారు.

శ్రీలంకలో హై అలర్ట్

గాలె నగరంలోని ప్రధాన ఆసుపత్రిలో గాయపడిన 32 మంది ఇరానియన్ నావికులకు ఎలైట్ కమాండోల రక్షణలో చికిత్స అందిస్తున్నారు. మరోవైపు, సముద్రంలో గాలిపోయిన 60 మంది నావికుల కోసం గాలింపు చర్యలు కొనసాగుతున్నాయి. శ్రీలంక అధ్యక్షుడు అనుర కుమార దిస్సానాయకే ఈ ఉద్రిక్త పరిస్థితులపై ఉన్నతాధికారులతో అత్యవసర సమీక్షా సమావేశాన్ని నిర్వహించారు.

విస్తరిస్తున్న యుద్ధ పరిధి

గల్ఫ్ ప్రాంతానికి వేల మైళ్ల దూరంలో, హిందూ మహాసముద్రంలో జరుగుతున్న ఈ దాడులు యుద్ధ పరిధిని మరింత విస్తరిస్తున్నాయి. ఇరాన్ ఇప్పటికే అమెరికా, ఇజ్రాయెల్ స్థావరాలపై దాడులు ప్రారంభించినట్లు సమాచారం. అమెరికా అధ్యక్షుడు డొనాల్డ్ ట్రంప్ నాయకత్వంలో జరుగుతున్న ఈ దాడులు ఇరాన్ ప్రభుత్వ పతనమే లక్ష్యంగా సాగుతున్నట్లు విశ్లేషకులు భావిస్తున్నారు.

అమెరికా ట్యాంకరుపై ఇరాన్ దాడి