ముగ్గురు భారతీయులను కిడ్నాప్‌ చేసిన ఆల్‌ఖైదా ఉగ్రవాదులు

దిశ, వెబ్ డెస్క్: పశ్చిమ ఆఫ్రికాలోని మాలి (Mali) దేశంలోని అనేక ప్రాంతాల్లో ఉగ్రవాద దాడులు కొనసాగుతున్నాయి. ఈ క్రమంలో జూలై 1న కాయెస్ ప్రాంతంలోని డైమండ్ సిమెంట్ ఫ్యాక్టరీపై జరిగిన దాడిలో ముగ్గురు భారతీయులను గుర్తు తెలియని దుండగులు బలవంతంగా తీసుకెళ్లారు. ఈ భారతీయులు ఆ ఫ్యాక్టరీలో కీలక బాధ్యతలు నిర్వహిస్తున్నట్లు సమాచారం. దాడి సమయంలో వారు విధుల్లో ఉండటంతో దుండగులు వారిని కిడ్నాప్ చేసినట్లు తెలుస్తోంది.

ఈ దుర్మార్గమైన హింసాత్మక చర్యను భారత్ తీవ్రంగా ఖండిస్తోంది. ఈ ఘటనపై భారత విదేశాంగ శాఖ (MEA) స్పందిస్తూ.. 'ముగ్గురు భారతీయుల అపహరణ ఘటనపై మేము తీవ్ర ఆందోళన చెందుతున్నాం. వారి సురక్షితమైన, వేగవంతమైన విముక్తికి మాలీ ప్రభుత్వంతో మేము నిత్యం సంప్రదింపులు జరుపుతున్నాం' అని పేర్కొంది. ఇక ఇప్పటివరకు ఈ కిడ్నాప్‌కు సంబంధించి ఏ ఉగ్రవాద సంస్థ బాధ్యత వహించలేదు. అయితే మంగళవారం మాలీలో జరిగిన సమన్విత దాడులపై ఆల్‌ఖైదా ఉగ్రవాద (Al-Qaeda terrorists) అనుబంధ సంస్థ అయిన జమాత్ నుస్రత్ అల్ ఇస్లామ్ వల్ ముస్లిమిన్ (JNIM) బాధ్యతను స్వీకరించినట్టు సమాచారం.

ఇక ఈ ఘటన నేపథ్యంలో మాలీలో ఉన్న ఇతర భారతీయులకు విదేశాంగ శాఖ గట్టి హెచ్చరికలు జారీ చేసింది. వారు అత్యంత జాగ్రత్తగా ఉండాలని, అపరిచిత ప్రాంతాల్లోకి వెళ్లకుండా జాగ్రత్తలు పాటించాలని, అలాగే బమాకోలోని భారత రాయబార కార్యాలయంతో ఎప్పటికప్పుడు సంప్రదింపులు కొనసాగించాలని సూచించింది.