ఏసీ బోగీలోనూ చెమటలు పట్టాయంటే దొంగలేనండోయ్..! యూపీ పోలీసుల షాకింగ్ అరెస్ట్..!

దిశ, వెబ్‌డెస్క్‌: ఉత్తరప్రదేశ్‌లో రైల్వే పోలీసులు ముగ్గురు ఘరానా దొంగలను అరెస్ట్ చేశారు. వీరి అరెస్ట్‌కు కారణం తెలిస్తే మాత్రం మీరు నవ్వాలో ఏడ్వాలో కూడా అర్థం కాదు..! అవునండీ బాబూ.. ఏకంగా ఏసీ బోగీలో ప్రయాణించినా వీరికి చెమటలు పట్టాయట.! దీన్ని బట్టే పోలీసులు వీరు "నీతిమంతులు" కాదని అనుమానించారు మరి..!

వివరాల్లోకి వెళితే.. ప్రభుత్వ రైల్వే పోలీసులు (GRP) ఒక రైలు ఏసీ బోగీ నుంచి దిగుతున్న ముగ్గురు వ్యక్తులను గమనించారు. సాధారణంగా ఏసీలో చల్లగా ఉండాలి కదా.. కానీ వీరు మాత్రం బాగా చెమటలు కక్కుతున్నారు. అనుమానం వచ్చిన పోలీసులు వారిని పట్టుకుని "ఏంటి సంగతి? ఏసీ లేదా మీ బోగీలో?" అని అడిగారు. అందుకు ఆ ముగ్గురు అమాయకంగా ఫేస్ పెట్టి "అయ్యో మహాప్రభో.. ఏసీబోగీ బాగా వేడిగా ఉంది స్వామీ!" అని కల్లబొల్లి కబుర్లు చెప్పారు. అయితే, రైల్వే అధికారులు మాత్రం ఆ బోగీలో ఎలాంటి సాంకేతిక లోపం లేదని తేల్చేశారు. దీంతో పోలీసుల అనుమానం మరింత బలపడింది. "పిల్లి శాకాహారం అంటే నమ్మొచ్చు కానీ.. ఏసీ బోగీలో చెమటలు పట్టాయంటే నమ్మేది లేదు" అని మనసులో అనుకున్నారట..

ఇక తమదైన శైలిలో పోలీసులు వారిని కాస్త గట్టిగా ప్రశ్నించగా అసలు విషయం బయటపడింది. ఆ ముగ్గురు కూడా మామూలు దొంగలు కాదండోయ్.. చాలా కాలంగా పోలీసులకు చిక్కకుండా తిరుగుతున్న "పాత నేరస్తులు" వారిపై గతంలో చాలా దొంగతనం కేసులు కూడా ఉన్నాయట. దీంతో పోలీసులు ముగ్గురినీ వెంటనే అరెస్ట్ చేసి తమ "ఆతిథ్యం" అందించారు. ఈ ఘటనతో ఉత్తరప్రదేశ్‌లో పోలీసుల చాతుర్యం మరోసారి వెలుగులోకి వచ్చింది. "చూశారా మా టాలెంట్? ఏసీలో చెమటలు పట్టినా సరే.. దొంగలను పట్టేస్తాం..!" అని పోలీసులు కాలర్ ఎగరేస్తున్నారు.

మొత్తానికి ఈ ఘటన ఒక సామెతను గుర్తు చేస్తోంది.. "దొంగ ఎప్పుడూ దొరికిపోతాడు!". కాకపోతే ఈసారి దొంగలు దొరికిపోవడానికి ఏకంగా ఏసీ బోగీలో చెమటలు పట్టడం విశేషం. ఇకపై దొంగలు ఏసీ బోగీలో ప్రయాణించే ముందు కాస్త జాగ్రత్తగా ఉండాలేమో.. లేదంటే పోలీసుల "వేడి" చూపులకు బలైపోక తప్పదు..!