అంబానీ ఇంటి ముందు బాంబులు.. తీహార్ జైలులో స్కెచ్..!
దిశ, వెబ్‌డెస్క్: ప్రముఖ పారిశ్రామికవేత్త ముఖేష్ అంబానీ ఇంటి సమీపంలో ఇటీవల భారీగా పేలుడు పదార్థాలను పోలీసులు గుర్తించిన సంగతి తెలిసిందే. ఈ కేసు దర్యాప్తులో సంచలన విషయాలు వెలుగుచూశాయి. బాంబు పేలుళ్ల కేసులో శిక్ష అనుభవిస్తున్న ఇండియన్ ముజాహిద్దీన్ ఉగ్రవాది తెహసీన్ అక్తర్ హస్తం ఉన్నట్టు అధికారులు గుర్తించారు. ప్రస్తుతం ఇతడు ఢిల్లీలోని తీహార్ జైలులో శిక్ష అనుభవిస్తున్నాడు. అంబానీ ఇంటి వద్ద బాంబు బ్లాస్ట్‌ను పోలీసులు భగ్నం చేసిన అనంతరం.. ఆ ప్లాన్ చేసింది తామేనని.. ఇది కేవలం ట్రైలర్ మాత్రేమేనని.. జైషుల్ హింద్ హెచ్చరించడంతో ఇంటెలిజెన్స్ వర్గాలు అప్రమత్తమయ్యాయి. ఓ టెలీగ్రామ్ అకౌంట్ ద్వారా ఈ ప్రకటన వెలువరించడంతో.. దానికి సంబందించిన మొబైల్ నెంబర్ లింకులు దక్షిణ ఆసియాలోనే అతి పెద్ద కారాగార ప్రాంగణము అయిన తీహార్ జైలులో బయటపడ్డాయి.
ఈ క్రమంలోనే టెలీగ్రామ్‌ను అనుసంధానం చేసిన మొబైల్ నెంబర్ సిగ్నల్స్ తీహార్ జైలులోనే ట్రేస్ కావడంతో పోలీసులు గురువారం దాడులు నిర్వహించారు. ఉగ్రవాది తెహసీన్ అక్తర్ ఉంటున్న జైల్‌లో సోదాలు నిర్వహించగా.. అతడి వద్ద ఓ సెల్‌ఫోన్ బయటపడింది. అదే మొబైల్ నుంచి జైషుల్ హింద్ అనే టెలీగ్రామ్ అకౌంట్ కూడా క్రియేట్ చేసి ఉండడంతో పోలీసుల అనుమానం నిజమైంది. ఇదే సెల్ ఫోన్ నుంచి ఫిబ్రవరి 26న అకౌంట్‌ను క్రియేట్ చేశారని.. ఆ మరుసటి రోజు అంబానీ ఇంటి వద్ద బాంబు పేలుడుకి కూడా బాధ్యత వహిస్తూ ప్రకటించినట్టు దర్యాప్తులో వెల్లడైంది. కానీ, మొబైల్‌లో వాడుతున్న సిమ్ కార్డు ఢిల్లీకి చెందిన ఓ వ్యక్తి పేరు మీద ఉందని.. కారాగారంలోకి ఎలా వచ్చిందన్న విషయంపై ఎన్ఐఏ అధికారులు ఆరా తీస్తున్నారు. అయితే, ఇదే జైలులో మరికొంత మంది ఉగ్రవాదులు కూడా శిక్ష అనుభవిస్తున్నట్టు తెలుస్తోంది. ఈ నేపథ్యంలోనే మొత్తం 11 మందిని ఎన్ఐఏ అధికారులు అదుపులోకి తీసుకొని విచారణ చేస్తున్నారు.
ఎవరీ తెహసీన్ అక్తర్:
ఇండియన్ ముజాహిద్దీన్‌కు ఉగ్రవాద సంస్థకు చెందిన తెహసీన్ అక్తర్ దేశంలో జరిగిన పలు పలు బాంబు పేలుళ్లలో కీలక సూత్రదారి. 2014లో నరేంద్ర మోడీ ర్యాలీని లక్ష్యంగా చేసుకుని పాట్నాలో సీరియల్ పేలుళ్ల నేపథ్యంలో ఇతడిని పోలీసులు అరెస్ట్ చేసి.. తీహార్ జైలుకు తరలించారు. దీనికి తోడు హైదరాబాద్, బోద్ గయాలో జరిగిన సీరియల్ పేలుళ్లలో కూడా ఇతడి ప్రమేయం ఉంది. ఇటువంటి బాంబు పేలుళ్లతో సంబంధం కలిగిన వ్యక్తి.. ఏకంగా తీహార్ జైలులో మరో పేలుడుకు సహకరించడం గమనార్హం.
