వ్యూస్ కోసం ఇంతకు దిగజారుతారా.. నా తండ్రి మరణాన్ని కంటెంట్గా మార్చకండి: పవన్
దయచేసి నా తండ్రి మరణవార్తను వ్యూస్ కోసం కంటెంట్గా మార్చకండి.
దిశ, సినిమా: బిగ్బాస్ కంటెస్టెంట్ డీమాన్ పవన్ (Demon Pawan) కుటుంబంలో తీవ్ర విషాదం నెలకొంది. ఆయన తండ్రి గత కొంతకాలంగా క్యాన్సర్తో పోరాడుతూ ఇటీవల కన్నుమూశారు. ఈ వార్త తెలిసిన బిగ్బాస్ సన్నిహితులు, అభిమానులు ఆయనకు సంతాపం ప్రకటించారు. అయితే, ఈ విషాదాన్ని కూడా కొందరు తమ స్వార్థానికి వాడుకొని పలు థంబ్నెయిల్స్ను వైరల్ చేస్తున్నారు. తాజాగా, ఈ విషయంపై స్పందించిన పవన్ తీవ్ర ఆగ్రహం వ్యక్తం చేశారు. తండ్రి మరణం తర్వాత సోషల్ మీడియాలో వస్తున్న కొన్ని వార్తలు, థంబ్నెయిల్స్పై పవన్ ఇన్స్టాగ్రామ్ ద్వారా ఓ పోస్ట్ పెట్టారు. "దయచేసి నా తండ్రి మరణవార్తను వ్యూస్ కోసం కంటెంట్గా మార్చకండి. జీవితంలో కొన్ని క్షణాలు గౌరవానికి అర్హమైనవి, కేవలం వ్యూస్ కోసం కాదు. నా తండ్రి అంత్యక్రియలు నేనే నిర్వహించాను" అని ఆయన స్పష్టం చేశారు.
ముఖ్యంగా సోషల్ మీడియాలో కొంతమంది బిగ్బాస్ కంటెస్టెంట్స్ పవన్కు భారీగా ఆర్థిక సాయం చేశారంటూ వస్తున్న వార్తలను ఆయన ఖండించారు. "నాకు ఎవరూ ఆర్థికంగా సహాయం చేయలేదు. హైప్ కోసం తప్పుడు థంబ్నెయిల్స్ పెట్టడం, తప్పుడు వార్తలు పోస్ట్ చేయడం ఆపండి. వ్యూస్ కోొసం దిగజారకండి. కొంతమంది ఫోన్ చేసి నైతిక మద్దతు ఇచ్చారు. వారికి నా ధన్యవాదాలు. అలాగే అంత్యక్రియలకు వచ్చి నా పక్కన నిలబడిన వారికి నేను కృతజ్ఞుడిని" అని పవన్ రాసుకొచ్చారు. "జీవానికి గౌరవం దక్కాలి" అంటూ ఆయన చేసిన ఈ పోస్ట్ ప్రస్తుతం వైరల్ అవుతోంది. పవన్ ఆవేదనను అర్థం చేసుకున్న నెటిజన్లు, యూట్యూబ్ ఛానెళ్లు బాధ్యతగా వ్యవహరించాలని కోరుతున్నారు.
