వరలక్ష్మి యాక్టర్ అవ్వాలనుకున్నప్పుడు వాళ్ల నాన్న చాలా టార్చర్ చేశారు.. రాధికా షాకింగ్ కామెంట్స్

దిశ, సినిమా: నటిగా తనకంటూ ఒక ఫైర్‌బ్రాండ్ ఇమేజ్‌ను సొంతం చేసుకున్న వరలక్ష్మీ శరత్‌కుమార్(Varalakshmi Sarathkumar), ఇప్పుడు దర్శకురాలిగా తన అదృష్టాన్ని పరీక్షించుకోబోతున్నారు. ఆమె స్వీయ దర్శకత్వంలో ప్రియమణి, ప్రకాష్ రాజ్ వంటి హేమాహేమీలతో కలిసి నటించిన ‘సరస్వతి’(Saraswati) చిత్రం మార్చి 6న విడుదలకు సిద్ధమైంది. ఈ సందర్భంగా జరిగిన ప్రీ-రిలీజ్ ఈవెంట్‌లో సీనియర్ నటి రాధిక పంచుకున్న కొన్ని ఆసక్తికర విషయాలు నెట్టింట వైరల్ అవుతున్నాయి. ‘‘వరలక్ష్మి సినిమాల్లోకి వస్తానంటే శరత్ గారికి అస్సలు ఇష్టం లేదు. 'నువ్వు యాక్ట్ చేయకూడదు.. ఎలా నటిస్తావ్ అసలు?' అని తను చాలా సీరియస్ అయ్యేవారు. చాలా టార్చర్ చేశారు.

ఎంతలా అంటే, వరలక్ష్మిని నటిగా తీసుకోవద్దని ముందే నిర్మాతలకు కూడా వార్నింగ్ ఇచ్చేవారు. ఒకరోజు వరు తన మదర్‌తో కలిసి నా దగ్గరకు వచ్చి తన బాధ చెప్పుకుంది. శరత్ గారు వినడం లేదని ఏడ్చింది. నేనేం చేయాలో అర్థం కాక, వాళ్లిద్దరినీ తీసుకుని నేరుగా శరత్ గారు షూటింగ్ చేస్తున్న సెట్‌కు వెళ్లాను. మేము వెళ్లేసరికి అక్కడ సీన్ ఏంటో తెలుసా? శరత్ గారు నమితతో కలిసి ఒక మాస్ సాంగ్‌కు విపరీతంగా డ్యాన్స్ చేస్తున్నారు. మమ్మల్ని చూడగానే ఆయనకు ఏం చేయాలో అర్థం కాలేదు. ఒక్కసారిగా డ్యాన్స్ ఆపేసి సైలెంట్‌గా కారవాన్‌లోకి వెళ్లిపోయారు. ఆ తర్వాతే వరు పట్టుదల చూసి తను నటించడానికి ఒప్పుకున్నారు. వరు ఫస్ట్ మూవీ ‘పోడాపోడీ’ చూడగానే నాకు నమ్మకం కలిగింది.. తను చాలా పెద్ద నటి అవుతుందని అప్పుడే చెప్పాను.

వరు కెరీర్‌లో ఇంకో ముఖ్యమైన విషయం ఏంటంటే.. తను తెలుగు సినిమాల మీద దృష్టి పెట్టాలని సలహా ఇచ్చింది నేనే. ఈరోజు తను నటిగా సెటిల్ అయ్యి, ఇప్పుడు ఏకంగా ‘సరస్వతి’ లాంటి పెద్ద సినిమాతో డైరెక్టర్‌గా మారుతుంటే నాకు చాలా గర్వంగా ఉంది. ఈ సినిమాలో ప్రియమణి, ప్రకాష్ రాజ్ లాంటి గ్రేట్ యాక్టర్స్‌ని తను హ్యాండిల్ చేయడం మామూలు విషయం కాదు. మార్చి 6న ఈ సినిమా వస్తోంది.. ఖచ్చితంగా పెద్ద హిట్ అవుతుంది’’ అని చెప్పుకొచ్చింది. ప్రస్తుతం ఇందుకు సంబంధించిన వీడియోలు నెట్టింట వైరల్ అవుతుండటంతో ఈ విషయం తెలుసుకున్న నెటిజన్లు ఆశ్చర్యపోతున్నారు.